Դեմիրթաշը Էրդողանին. «Մինչև հիմա քո համալսարանի դիպլոմը տեսնող չի եղել»
Թուրքիայի նախագահ Ռեջեփ Թայիփ Էրդողանը նախընտրական քարոզարշավի ընթացքում Տրապիզոն քաղաքում տեղի ունեցած հանրահավաքի ժամանակ քննադատել է այն մարդկանց, ովքեր կոչ են անում ազատ արձակել նախագահի թեկնածու Սելահաթթին Դեմիրթաշին։Վերջինս նախկինում զբաղեցնում էր Թուրքիայի ընդդիամդիր քրդամետ «Ժողովուրդների դեմոկրատական կուսակցության» (ԺԴԿ-HDP) համանախագահի պաշտոնը։
«Ի՞նչ են նրանք խոսում։ Ասում են ազատ արձակի նախագահի թեկնածուին։ Բայց նախագահ լինելու համար պետք է լինեն համապատասխան չափանիշներ։ Այդ իսկ պատճառով նման կոչ անողները սխալ են, պետք է շտկումներ իրականացվի»։
Ի պատասխան Էրդողանի նշյալ մեկնաբանությանը՝ բանտում գտնվող Դեմիրթաշը «Twitter»-ի էջում գրել է.
«Այս անգամ ես միանում եմ քեզ։ Օրինակ՝ նախագահ լինելու համար անպայման պետք է ունենալ համալսարանի դիպլոմ, բայց մինչև հիմա քո դիպլոմը տեսնող չի եղել։ Իմ առումով չափանիշների հարցում ամեն ինչ կարգին է, իսկ այ քեզ մոտ կասկածելի երևույթներ կան»։
