Մանվել Գրիգորյանի տանը գտնված մեքենաները բանակի հետ ոչ մի կապ չունեն. Արցախի Պնախարար
Արցախյան բանակին նվիրած մեքենաները հենց բանակի հաշվեկշռում են։ Այս մասին այսօր Ստեփանակերտում կայացած ասուլիսի ընթացքում ասել է Արցախի պաշտպանության բանակի հրամանատար գեներալ-լեյտենանտ Լևոն Մնացականյանը: Նրան հայտնի չէ` ինչի վրա են հիմնվում խոսակցություններն այն մասին, որ Պաշտպանության բանակի մեքենաները հայտնվել են կալանավորված Մանվել Գրիգորյանի մոտ։
«Այդպիսի բան չկա։ Համացանցում նյութ կար, որ աստրախանցի բարերարները «Երկրապահ» մեքենաներ են փոխանցել, նրանք են դրա մասին ասել։ Ամենայն պատասխանատվությամբ հայտարարում եմ, որ Պաշտպանության բանակին նվիրած բոլոր մեքենաները Պաշտպանության բանակի հաշվեկշռում են։ Գրիգորյանի առանձնատան խուզարկության ընթացքում գտնվածները Պաշտպանության բանակի հետ կապ չունեն», - ասել է Մնացականյանը։
Նա հասարակությանը հորդորեց սպասել դատարանի որոշմանը, երբ բոլոր հարցերի պատասխաններ կտրվեն։
