Խուզարկություններ են կատարվել Նորատուսցի Արայի բնակարաններում
Pastinfo-ի տեղեկություններով՝ քննչական կոմիտեն այսօր խուզարկություններ է կատարել Արա Բանդուրյանի բնակարաններում, ով քրեական աշխարհում հայտնի է որպես «Նորատուսցի Արա»։Նրա մասնակցությամբ զինված խուլիգանություն է տեղի ունեցել Հյուսիսային պողոտայում գործող «Հուկաման» ակումբում։
Հոկտեմբերի լույս 13-ի գիշերը՝ ժամը 03-ի սահմաններում, Արա Բանդուրյանը մի շարք այլ անձանց հետ այցելել է Երևան քաղաքի Հյուսիսային պողոտա 4/1 հասցեում գտնվող «Հուկաման» ակումբ՝ թերեւս ժամանակ անցկացնելու, որտեղ նրա տրամադրությունն այնքան է լավացել, որ հանել է ատրճանակն ու սկսել կրակել։ Հրապարակված տեսանյութում երեւում է, որ սեղանին դրված են ինչ-որ շշեր, իսկ սեղանի շուրջ եղել է նաեւ կին, երբ Արա Բանդուրյանը ատրճանակով սկսում է կրակել պատի ուղղությամբ։ Պատի վրա հայտնաբերվել է թվով 5 հատ կրակվածի հետք։
Դեպքի առթիվ ոստիկանությունում հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասով։ Քրեական գործը հոկտեմբերի 14-ին ստացվել է Քննչական կոմիտեի Կենտրոն և Նորք-Մարաշ վարչական շրջանների քննչական բաժնում։ Մեր տեղեկություններով երեկ ակումբում կրկին կատարվել է դեպքի վայրի զննություն, ապա քննիչը միջնորդություն է ներկայացրել դատարան՝ կասկածյալի տներում խուզարկություն կատարելու վերաբերյալ, ինչը բավարարվել է։
