Հայտնի են ԱԺ նախագահի և փոխնախագահների անունները
Ավելի քան 70 տոկոս ձայն ստացած «Իմ քայլը» դաշինքում արդեն սկսվել են քննարկումները, թե ով ինչ պաշտոն կզբաղեցնի Ազգային ժողովում և կառավարությունում: Այս առումով, թերևս ամենաինտրիգայինը ԱԺ նախագահի հնարավոր թեկնածուի հարցն է: Մամուլում տևական ժամանակ շրջանառվում էր ՔՊ վարչության անդամ Լենա Նազարյանի անունը, վերջերս էլ՝ առաջին փոխվարչապետի պաշտոնակատար Արարատ Միրզոյանի մասին գրվեց: Առաջին փոխվարչապետի պաշտոնակատարը օրերս տված հարցազրույցներից մեկում չէր հերքել իր՝ ԱԺ նախագահ դառնալու հեռանկարը, թեև հավելել էր, որ այլ անուններ ևս քննարկվում են: Բացի Արարատ Միրզոյանից ԱԺ նախագահի պաշտոնի համար այլ թեկնածուի անուն, կարծես թե, չի քննարկվում և հենց նա էլ կզբաղեցնի ԱԺ նախագահի պաշտոնը, իսկ երկու փոխնախագահների պաշտոնները կտրվեն ՔՊ վարչության անդամներ Լենա Նազարյանին և Ալեն Սիմոնյանին:
