Ադրբեջանում շարունակվում է «դատական ֆարսը»՝ մեղադրյալի աթոռին Կարեն Ղազարյանն է
Ադրբեջանում շարունակվում է «հայ դիվերսանտ Կարեն Ղազարյանի դեմ դատավարություն» անվանմամբ ֆարսը։«Դատն» անցկացվում է Գյանջայում։ Այն վարում է դատավոր Կարարմետ Ալիեւը։ «Դատավարության ժամանակ լսվել են վկաների ցուցմունքները։ Այնուհետեւ Կարեն Ղազարյանը պատասխանել է իրեն հասցեագրված հարցերին»,- հայտնում է REAL TV-ն։
Կարեն Ղազարյանը մեղադրվում է Ադրբեջանի ՔՕ մի շարք հոդվածներով, մասնավորապես՝ կյանքի եւ առողջության դեմ հանցագործությունների, տնտեսական գործունեության ոլորտում հանցագործությունների, հասարակական անվտանգության դեմ հանցագործությունների համար։
Հայաստանի քաղաքացի Կարեն Ղազարյանը գերեվարվել է այս տարվա ամռանը։ Երիտասարդը տառապում է հոգեկան հիվանդությամբ, սակայն դա չի խանգարում ադրբեջանական իշխանություններին նրան «դիվերսանտ» ներկայացնել։
