Անփորձությամբ, անորակ կադրերով կարող են կործանել երկիրը.Հաջորդ ընտրություններին տուն ենք ուղարկելու այս իշխանություններին
Մենք շատ հեռու ենք ժողովրդավարությունից ու անկախ դատական համակարգ ունենալուց: Այս մասին Արցախում մեկնարկած ՀՅԴ 33-րդ ընդհանուր ժողովում հայտարարեց ՀՅԴ Բյուրոյի ներկայացուցիչ Հրանտ Մարգարյանը: Հաղորդում է Tert.am-ը:«Խորհրդարանական ընտրությունների արդյունքում ձևավորվել է մի քաղաքական ուժի իշխանություն, որը, իր ձեռքում կենտրոնացնելով օրենսդիր, գործադիր իշխանությունը, իր ճնշման տակ է պահում դատական իշխանությունը, չորրորդ իշխանությունը: Խախտվել է կառավարման խորհրդարանական համակարգի կարևորագույն հատկանիշը՝ իշխանության հակակշռելիությունն ու հաշվետվողականության սկզբունքը: Չափազանց մեծ է վտանգը անձնակենտրոն իշխանության ձևավորման համար»,- նշեց Հ. Մարգարյանը:
Ըստ նրա՝ նոր իշխանությունները չեն արտահայտում ժողովրդական շարժման տրամադրությունները և անկարող են լուծել այն խնդիրները, որոնց համար սկիզբ առավ շարժումը: «Անփորձությամբ, սխալ կառավարմամբ ու անորակ կադրերով իշխանությունները կարող են վատագույն դեպքում երկիրը մի քանի տարով ետ քցել զարգացումից»,- հավելեց նա:
Հրանտ Մարգարյանը նկատեց, որ այլ ելք չի մնում, քան դիրքավորվել երկրի վտանգներին դիմագրավելու համար: Նա ասաց, որ իրենք շարունակելու են լինել ժողովրդի կողքին ու չեն թողնելու, որ կառավարությունն ու խորհրդարանը ճակատագրական սխալներ անեն: «Հաջորդ ընտրություններին տուն ենք ուղարկելու այս իշխանություններին և ստանձնելու ենք երկրի ամբողջական ղեկավարման գործը»,- շեշտեց ՀՅԴ Բյուրոյի ներկայացուցիչը:
