Տեսանյութ.Հայ ոսկերչի՝ թուրք սուլթանի համար պատրաստած բացառիկ հրացանը՝հազարավոր ադամանդներով և թանկարժեք քարերով
Luxury Launches կայքն ուշագրավ անդրադարձ է կատարել հայ ոսկերիչ վարպետներին՝ ներկայացնելով նրանցից մեկի՝ սուլթան Մահմուդ 1-ի համար 1732-1733 թթ. ստեղծված բացառիկ հրացանը, որը պատրաստված է ոսկուց, արծաթից, զարդարված է ադամանդներով, զմրուխտներով ու այլ թանկարժեք քարերով:«Թեև աշխարհում քչերին է հայտնի, սակայն Հայաստանը բարձրակարգ ոսկերիչների երկիր է, որոնցից որոշների արմատները դարերի պատմություն ունեն: Նրանց ստեղծած արվեստի գործերը բարձր են գնահատվում (սկսած Օսմանյան կայսրության դարաշրջանից), և եթե հավատանք արձանագրություններին, ապա հայերն աշխարհում առաջինն են մշակել մետաղն ու այն նախշազարդել»,-գրում է աղբյուրը՝ որպես ասվածի ապացույց բերելով հրացանը:
Ըստ տեղեկությունների՝ բացառիկ նմուշի հեղինակը սուլթանի քրիստոնյա ոսկերիչ Հովհաննես Աղա Դյուզն է: Նրա ստեղծած արվեստի գործը Մահմուդի համար ծառայել է որպես արարողակարգային օբյեկտ: Ոսկերչի վարպետության շնորհիվ հնարավոր է դարձել հրացանի մեջ տեղավորել նաև գրելու հարմարանքներ, ինչպես նաև ոչ պակաս ճոխ դաշույն:
«Հայազգի ոսկերիչներն Օսմանյան կայսրության ժամանակահատավածում համարվել են աշխարհում լավագույնը: Նրանք ոսկյա և արծաթյա իրեր պատրաստելուց զատ զբաղվել են նաև զենք-զրահի, ծիսական իրերի զարդարմամբ, թանկարժեք քարերի փայլեցմամբ: Եվ տեսնելով սուլթան Մահմուդ 1-ի համար պատրաստված աներևակայելի հրացանը՝ իսկապես չենք կարող չհամաձայնել, որ հայերը մեծ ճաշակ ունեն այս հարցում»,- եզրափակում է աղբյուրը։
