«30 մլն ոտի վրա ինձ քցել ա, ինչի՞ չեք ուզում խոսեմ». լարված իրավիճակ ԵՊՀ-ում
Հոգաբարձուների խորհրդի նիստում քննարկվում է ԵՊՀ ռեկտորի հրաժարականի հարցը: Քիչ առաջ ամբիոնին մոտեցավ մի քաղաքացի՝ նշելով, որ հայտարարություն ունի անելու: Նա ասաց, որ թույլ տան արտահայտվել, քանի որ այս ամենի հետ անմիջական կապ ունի: Հանձնաժողովի նախագահն արգելեց խոսել նրան, սակայն վերջինը շարունակեց. «Վերջում ինձ կլսե՞ք: Ամենակարևոր հարցն իմ հարցն ա: 30 մլն ոտի վրա ինձ քցելա, ինչի՞ չեք ուզում խոսեմ, ասեք: Մի քանի օր առաջ ոստիկանությունը հայտարարություն էր արել... Ես «Մարտական խաչ»-ի ասպետ եմ, դո՞ւ ինչի ասպետ ես, Սիմոնյանի՞ ասպետն ես».- դիմելով իրեն դուրս հրավիրող անվտանգության աշխատակցին՝ ասաց վրդովված քաղաքացին:«Ոչ սրիկա եմ, ոչ ստահակ, ինչո՞ւ չեք թողնում ելույթ ունենամ: Ուզում եք մարդու ճակատագիրը որոշեք՝ թողեք մարդիկ արտահայտվեն, որոշեն»:
Խորհրդի անդամներից մեկը տեղից արձագանքեց. «Բա կարելի՞ է էսքան բազմության մեջ քննարկել այդ հարցը»: Քաղաքացին ավելի վրդովվեց. «Մարդիկ հայ են, բազմություն չեն այ ընկեր, ի՞նչ ա նշանակում բազմություն»:
Որոշվեց հոգաբարձուների նիստն անցկացնել փակ: Մեծամասնությունը որոշմանը կողմ քվեարկեց:
Հիշեցնենք, որ Երևանի պետական համալսարանի հոգաբարձուների խորհրդի նիստում քննարկվում է ԵՊՀ ռեկտոր Արամ Սիմոնյանի լիազորությունների դադարեցման հարցը:
