Տեսանյութ.Իրավիճակը վարչապետ Փաշինյանին ճիշտ չի ներկայացվել՝ այստեղ պատկան մարմինների անգործություն և միտում եմ տեսնում
Հայացք մամուլի ակումբում Արմավիր-Երևան երթուղին սպասարկող «Գալակտիկա տրանս սերվիս» ՍՊԸ-ի տնօրեն Շուշանիկ Խաչատրյանը և փաստաբան Գուրգեն Գրիգորյանը խոսեցին
Արմավիր-Երևան երթուղում շահագործվող անօրինական գծերի մասին, որոնք վաճառվել են Տրանսպորտի և կապի նախարարության կողմից, անդրադարձան երթուղին սպասարկող վարորդների անժամկետ բողոքի ակցիաներին: Գուրգեն
Գրիգորյանը նշեց, որ «Գալակտիկա տրանս սերվիս» ՍՊԸ-ն կանոնավոր փոխադրումներ իրականացնող խոշոր կազմակերպություն է և ավելի քան 30 տարի է
ինչ զբաղվում է այս գործունեությամբ: Տևական ժամանակ է ինչ ընկերությունը խնդիրների
առաջ է կանգնել: Նախկինում ևս նմանատիպ խնդիրներ եղել են, սակայն ընկերության տնօրինությունը
կարողացել է այն հարթել. «Մենք մեր իրավունքների պաշտպանության և կատարվող ապօրինությունների
վերաբերյալ բազմաթիվ դիմումներ ենք ներկայացրել համապատասխան մարմինների, որոնք, ըստ
էության, մնացել են անարդյունք: Հեղափոխությունից
հետո պատկան մարմինների անգործության հետևանքով առաջացած կազուսային իրավիճակը հանգեցրել
է բազմաթիվ խնդիրների, ընդհուպ այն բանին, որ այս պահին ընկերությունը դադարեցրել է
իր գործունեությունը: Իսկ ապօրինությունները մինչ օրս շարունակվում են»,-ասաց Գուրգեն
Գրիգորյանը:
Շուշանիկ
Խաչատրյանն էլ նշեց, որ բազմիցս դիմել են թե՛ Կապի և տրանսպորտի նախարարությանը, թե՛ այլ լիազոր մարմինների, սակայն շարունակվում են խախտվել «Գալակտիկա տրանս սերվիս» ՍՊԸ-ի իրավունքները և չեն դադարում Երևան-Արմավիր-Երևան երթուղում ապօրինի իրականացվող ուղևորափոխադրումները. «Խնդիրն առաջացել է այն բանից հետո, երբ այլ կազմակերպություններ, այլ ուղղություններ սպասարկելու անվան տակ, սպասարկում են Արմավիր-Երևան երթուղին՝ ավելի վատ պայմաններում: Սրա արդյունքում՝ ընկերությունը չվացուցակին համապատասխան ուղևորափոխադրումներ իրականացնելիս վնասներ է կրում, քանի որ ուղևորների թիվը պակասել է. ուղևորները նախընտրում են ավելի մատչելի, սակայն ավելի վատ պայմաններով երթևեկել: Այս պահին 26 վարորդ կառավարության շենքի դիմաց գործադուլ
և բողոքի ակցիա է իրականացնում: Վարորդներն այս պահին գիծ դուրս չեն գալիս: Մենք բողոքի
ակցիան շարունակելու ենք այնքան ժամանակ, մինչև այս խնդիրը չլուծվի»,-ասաց Շուշանիկ
Խաչատրյանը:
Շուշանիկ Խաչատրյանը նաև համոզմունք
հայտնեց, որ իրավիճակը վարչապետ Փաշինյանին ճիշտ չի ներկայացվել. «Վստահ ենք 10 րոպեի
ընթացքում կարող են ներկայացնել իրավիճակը: Ես այստեղ, նախ և առաջ, պատկան մարմինների
անգործություն եմ տեսնում, հետո՝ միտում: Ես սա գնահատում են նաև որպես ռեկետ: Մեկ
տարի անընդհատ դիմես տարբեր մարմինների, ոչինչ չանեն այնքան ժամանակ, մինչև փակվե՞ս»:
