Դմիտրի Անատոլևիչ, սուրճը դա՞ռը, թե՞ քաղցր. չստացված երկխոսության մեսիջը հստակ էր. «Իրատես»
«Իրատես» թերթը գրում է. «Թանկ հյուրերին հայերս սեփական հարկի տակ ենք ընդունում` կարևորելով նրա անձն ու նշանակությունը: Վարչապետ Նիկոլ Փաշինյանի այս խոսքն ուղղված էր ԵԱՏՄ-ի անդամ երկրների կառավարությունների ղեկավարների միջկառավարական խորհրդի նիստին մասնակցելու կապակցությամբ Հայաստան այցելած Ռուսաստանի վարչապետ Դիմտրի Մեդվեդևին:Թե ինչով էր պայմանավորված Հայաստան այցելած բազմաթիվ հյուրերից հենց ՌԴ վարչապետին առանձնացնելն ու կառավարական ամառանոց հրավիրելը, դժվար չէ գուշակել: Հայաստանի իշխանությունները երիցս փորձում են ապացուցել ավագ եղբորը, որ շփման մեջ անկեղծ են, հարաբերություններում` հավատարիմ: Հասարակության լայն շրջանակներին էական չէ, թե ԵՏՄ նիստի ժամանակ ինչ կարևոր հարցեր են քննարկվել: Բոլորի ուշադրության կենտրոնում սրճախմության անմեղ պատմությունն է:
Մեդվեդևի` Փաշինյանին ուղղված «Перейти куда?» կեսկատակ-կեսլուրջ հարցադրումն ու դրան հաջորդած ծիծաղը փոթորկել են հասարակության կրքերը, այն աստիճանի, որ ՀՀ վարչապետը հարկ է համարել անդրադառնալ դրան: Երկրի թիվ մեկ դեմքը գերզբաղված օրակարգից ժամանակ է տրամադրել ու բացատրել` ներկաների ծիծաղը պայմանավորված էր սուրճի ընդմիջման գնալու ցանկությամբ:
Կոնկրետ ինձ համար ծիծաղելին ոչ թե Փաշինյան-Մեդվեդև երկխոսությունն էր, այլ ՀՀ վարչապետի «կրուտիտն» ու նրա թիմակիցների` «շեֆի թասիբը պահելու» չինովնիկական մոլուցքը:
Թե՛ խորհրդարանական մեծամասնության պատգամավորները, թե՛ գործադիրի ներկայացուցիչները մեկը մյուսի հետևից անարգանքի սյունին գամեցին ՌԴ վարչապետին` շեշտելով Նիկոլ Փաշինյանի մեծահոգաբար լռելու ու «դուխով» լինելու հատկանիշը: Սրճախմության անմեղ զրույցի մեջ ԱԺ փոխնախագահ Ալեն Սիմոնյանը, օրինակ, մեծագույն «դուխ» է տեսել, պատգամավորներից մեկն էլ դիմել է 10-ից ավելի լեզվաբանների` համոզվելու, որ վարչապետը լեզվական սխալ թույլ չի տվել:
Է՛լ Դիմա, է՛լ Դիմոչկա, է՛լ «հայերի փողերով ապրող» բնորոշումներով դիմեցին մի մարդու, որին նախորդ օրն իրենց քաղաքական հայրը, խախտելով քաղաքական էթիկայի նորմերն ու երկրորդելով մյուս հյուրերի ներկայությունը, առանձնահատուկ հյուրընկալության էր արժանացրել: Իսկ սրճախմության մասին չստացված երկխոսության մեսիջը հստակ էր` Մոսկվայում դժգոհ են հայ-ռուսական հարաբերություններից»:
Առավել մանրամասն՝ թերթի այսօրվա համարում:
