Տեսանյութ. Կարող ենք մեծ-մեծ բաներ խոսել, բայց Ադրբեջանը չի ճանաչելու իր պարտությունը.
Դիվանագիտական դաշտում հաղթանակը երեւի այն է, որ մեզ համատարած ագրեսոր չեն համարում: Այս մասին այսօր՝ մայիսի 9-ին, Ստեփանակերտում զրույցում նշել է նախկին վարչապետ, տնտեսագետ Հրանտ Բագրատյանը:Դիտարկմանը, թե կա տեսակետ, որ ռազմական դաշտում հաղթանակը չհաջողվեց ամրապնդել եւ ամրացնել դիվանագիտական դաշտում, նա արձագանքեց. «Ես դիվանագետ չեմ, ես ընդամենը քաղաքական գործիչ եմ, եւ տնտեսագետ, չգիտեմ ինչ են նշանակում՝ ամրապնդել դիվանագիտական դաշտում: Կարող ենք մեծ-մեծ բաներ խոսել, բայց չի լինելու այդպես, որ հակառակորդը ճանաչի իր պարտությունը: Համեմատելի բաներ չեն:
Պատերազմում կարող է դու հաջող լինես, կարող է դու հաղթես: Բայց այստեղ հաղթանակը այն դեպքում է գալիս, երբ հակառակորդը ձեռքերը բարձրացնում ու ասում է՝ պարտվել եմ: Այդ բանը հակառակորդը չի անում, եւ չի անի: Դիվանագիտական դաշտում հաղթանակը երեւի այն է, որ մեզ համատարած ագրեսոր չեն համարում: Դա շատ էական է: Գուցե երկրների մեծ մասը հասկանում է, որ այստեղ ագրեսորի հարց չկա, որ սա ազգային-ազատագրական պայքար է:
Կարելի է բողոքել դիվանագիտությունից կամ տնտեսագետներից: Ավելին կարող էր երեւի լինել: Ինչքան այստեղ հաղթանակ ենք արել, այնքան դիվանագիտության ասպարեզում հակառակորդը փորձել է «ռեւանշ» վերցնել»:
