Մանվել Գրիգորյանի կենսաթոշակի վրա դրված արգելանքը հանվեց. ինքնազգացողությունը վատացավ
Այսօր ընթացող դատական նիստի ժամանակ Մանվել Գրիգորյանի պաշտպան Լևոն Բաղդասարյանը միջնորդեց վերացնել Գրիգորյանի կենսաթոշակի և գույքի վրա դրված արգելանքը:Մասնավորապես գույքի մասով միջնորդությունը վերաբերում էր «Ակնալճի կուղբաբուծական տնտեսություն» ԲԲԸ-ին:
Վերջինը, ինչպես ավելի վաղ հայտնել էինք, Մանվել Գրիգորյանը պետք է նվիրաբերի պետությանը:
Դատախազ Դոլմազյանը նշեց, որ վերոնշյալ ընկերությունը պատկանում է Մանվել Գրիոգորյանի որդուն՝ Կարեն Գրիգորյանին և վերջինիս համաձայնությունը չկա՝ հավելելով, որ տվյալ միջնորդությունը պետք է մերժվի:
«Կառավարությունն ասում է՝ չեմ կարողանում գործընթացը սկսել, քանի որ գույքը արգելանքի տակ է, իսկ արգելանքը հանել-չհանելը դատարանի տիրույթում է»,- հայտարարեց Լևոն Բաղդասարայանը:
Արդյունքում՝ դատավոր Մնացական Մարտիրոսյանը որոշեց այս մասով միջնորդության լուծումը հետաձգել մինչև մի շարք էական հանգամանքների պարզումը:
Իսկ կենսաթոշակի վրա դրված արգելանքի մասով դատարանը որոշեց բավարարել պաշտպանի այս միջնորդությունը՝ հանելով կենսաթոշակի վրա դրված արգելանքը:
Քիչ առաջ դատավոր Մնացական Մարտիրոսյանը հայտնեց, թե ընդմիջման ընթացքում շտապօգնության աշխատակիցը հայտնել է, որ Մանվել Գրիգորյանը չի կարող շարունակել մասնակցել դատական նիստին՝ կապված առողջական խնդիրների հետ:
Դատավորը որոշում կայացրեց հետաձգել դատական նիստը: Հաջորդ նիստը կայանալու է հաջորդ երեքշաբթի, ժամը 12:00-ին:
Նշենք, որ այսօր Գրիգորյանը դատական նիստերի դահլիճ եկավ ու հեռացավ անվասայլակով:
