Ոստիկանությունն այժմ թավշյա է, շատ վճռական և օրենքով սահմանված չափով ուժ կկիրառի, եթե անհրաժեշտություն լինի
«Ես չեմ բացառում նման բանը, որովհետև բավականին մեծ զանգված էր հավաքված՝ մոտ 500 հոգի, եթե ոչ՝ ավելի, պարզ է, որ դա կարող է նաև կազմակերպված լինել ինչ-որ մի խումբ մարդկանց կողմից, որոնք շահագրգիռ են այդ հարցում»,- այսօր կառավարության նիստից հետո լրագրողների հետ զրույցում հայտարարեց փոխոստիկանապես Վարդան Մովսիսյանը՝ պատասխանելով հարցին, թե երեկ Իջևանում ակցիան կազմակերպվա՞ծ էր:Ըստ նրա՝ ոստիկանությանը հայտնի է, թե ովքեր են ապօրինի ծառահատումների բիզնեսի իրական ղեկավարները, բայց դա դեռևս հրապարակման ենթակա չէ: Վ.Մովսիսյանի խոսքով՝ ոստիկանական աշխատանքներն ու միջոցառումները շարունակվում են, վարչապետի հնչեցրած 36 հոգին այդ հակաօրինական գործողությունների ակտիվ մասնակիցներն են, և ցանկը կազմվել է ձայնագրություններով ու այլ տվյալներով ուսումնասիրությունների արդյունքում: Ըստ փոխոստիկանապետի՝ քննությունը կորոշի այդ անձանց կատարած օրինախախտումների չափը: «Խոսքը չի գնում սոցիալապես անապահով մարդկանց մասին, խոսքը գնում է զուտ բիզնեսի, այսինքն՝ ապօրինի անտառահատման, և Արարատյան դաշտավայրում, կամ այլ տարածքներում, որտեղ չկան անտառներ, վաճառելու մասին: Սոցիալական խնդիր այստեղ չկա, քանի որ այն քանակը փայտի, որը գյուղացիները և այդ համայնքների ազգաբնակչությունը օգտագործում է իր վառելիքի համար, դա բավարար է իրենց համար»,- ասաց Վ.Մովսիսյանը: Թե քանի՞ բեռնատար են կանգնեցրել ոստիկանական պահակակետերը, փոխոստիկանապետը նշեց, որ մի քանի անշարժ պահակակետեր կան, եղել են դեպքեր, որ չեն ենթարկվել մեքենաները, որոնց մասին կասկած է եղել, որ կարող է փայտով բարձված լինել, և այժմ նաև աշխատանքներ են իրականացվում այդ մեքենաների օպերատիվ հայտնաբերման համար:
Նրա կարծիքով՝ այդ բիզնեսի ղեկավարները չկան արդեն ձերբակալված կամ բերման ենթարկված անձանց մեջ: Հարցին, թե ինչո՞ւ այս տարիների ընթացքում չի բացահայտվել այդ կոռուպցիոն սխեման, փոխոստիկանապետը պատասխանեց. «Եկեք ինքներս մեզ չխաբենք, մենք այն հանրապետությունն ենք և այն ազգաբնակչությունն ենք, որ շատ լավ տեղեկացված է բոլոր պրոցեսներից: Այնպես չէ, որ այդ աշխատանքները ապօրինի ծառահատման կանխման ուղղությամբ չեն իրականացվել ոստիկանության կողմից, դրանք եղել են ակտիվացման փուլում, այն, ինչ եղել է մինչև իրավիճակի փոփոխությունը, դա, իհարկե, առանձին քննարկման խնդիրներ են, դրանք եղել են, բացասական երևույթները և կոռուպցիոն երևույթները եղել են: Լոռու և Տավուշի տարածքներում մոտ 30 տարի, կարելի է ասել, եղել են»: Հարցին՝ արդյո՞ք այս ակցիան քաղաքական հողի վրա է հրահրված, Վ.Մովսիսյանը պատասխանեց, որ դա արվել է՝ որպես բիզնես և, ինչպես նշեց վարչապետը, սևագործ աշխատանքն իրականացնողները երևի թե չեն հարստացել, բայց մի խումբ մարդիկ, որոնք ղեկավարել են և ստվերում են գտնվել, նրանք հարստացել են:
«Այս պահին իրավիճակն այնտեղ կայուն է, և չեմ կասկածում, որ կհրավիրվեն մարդիկ քննության ընթացքում, եթե պարզվի այդ մարդկանց ինքնությունն ու մասնակցությունն ապօրինի ծառահատման գործում, անպայման կհրավիրվեն և կպատժվեն: Չի կարելի պետության առջև դնել պայմաններ, որոնք անօրինական են»,- ասաց փոխոստիկանապետը՝ հավելելով, որ կետերն ուժեղացվել են, թեև իրավիճակը կայուն է, ոստիկանական զորքեր են տեղափոխել այդ տարածք՝ որպես կանխարգելիչ գործողություն, քանի որ կարող է անկանխատեսելի, անցանկալի պահեր լինեն: Դիտարկմանը, որ սա ոստիկանության թուլության նշան է, որ ոստիկանների հետ այդպես են վարվում, Վ.Մովսիսյանը պատասխանեց. «Ոստիկանությունը, իհարկե, աշխատում է ազգաբնակչության հետ լինել լոյալ և ուժ կիրառել միայն օրենքով սահմանված կարգով: Ոստիկանությունն ուժ կիրառելու իրավունք ունի, դա ամրագրված է օրենքով, բայց կարող է տպավորություն ստեղծվել, որ դա ոստիկանության թուլությունն է, որի հետ ես ընդհանրապես համաձայն չեմ: Մենք ունենք այսօր երևույթներ, որ ճանապարհներ են փակվում, որոշ դեպքերում կարող է թվալ, որ դրանք արդարացի են, որոշ դեպքերում՝ ոչ, բայց ոստիկանությունն իր գործառույթներն իրականացնում է՝ զուտ օրենքի կետից ելնելով»:
«Նախկինում ուժ էր կիրառվում, դրա համար էլ հեղափոխություն եղավ»,- նկատեց Մովսիսյանը՝ հերքելով՝ ոստիկանությունն այժմ թավշյա է: Ըստ նրա՝ ոստիկանությունը շատ վճռական է և օրենքով սահմանված չափով ուժ կկիրառի, եթե անհրաժեշտություն լինի:
Վ.Մովսիսյանը հերքեց քաղաքացիների պնդումները, թե «կարմիր բերետավորները կոտրել են երեխայի գլուխը, գիշերով եկել, տարել են»։
«Նման բան չկա, ժողովրդին առաջարկվել է մոտ 200 աշխատատեղ, դա Տավուշի մարզպետն է հնչեցրել, այսինքն՝ աշխատատեղեր կան, բայց ցանկություն հայտնողներ չկան: Երևի թե ապօրինի անտառահատումն ավելի հեշտ և արագ օգուտ է բերում, կամ օրինական, ամսական փող աշխատելը»:
Հարցին՝ նախկինում եղե՞լ են դեպքեր, որ ոստիկանները պատժվեն ապօրինի հատված ծառերով մեքենաներին ճանապարհ տալու համար, Վ.Մովսիսյանը պատասխանեց, թե բազմիցս եղել են դեպքեր, ԱԱԾ-ն իրականացնում է քննություն, որ կոնկրետ ոստիկանության մեկ աշխատակից մասնակից է եղել նման պրոցեսի ու գտնվում է քննության տակ:
