Ջավախքից բեռնատարները հասան Հայաստան. Տեսանյութ          Միայն այս դեպքում հնարավոր կլինի Ղարաբաղյան հակամարտության լուծումը.Չավուշօղլու       Զորակոչված կամ կամավորագրված անձանց համար բանկերում ամսական մարումները չկատարելու դեպքում ուշացում չեն համարվի    

27 օգոս 2019 11:37

Տեսանյութ. Ադրբեջանն իր հայատյաց անփոփոխ քաղաքականությամբ շարունակում է մնալ Արցախի ժողովրդի գոյության սպառնալիքը

«Հայաստանը հանդես է գալիս ղարաբաղյան հակամարտության խաղաղ կարգավորման դիրքերից, սակայն չի կարող ընդունել Ադրբեջանի կողմից բացահայտ կամ քողարկված ուժի կիրառման սպառնալիքները և հրադարադարի ռեժիմը պայմանական դարձնելու որևէ նկրտում»,- այսօր՝ դիվանագիտական ներկայացուցչությունների ղեկավարների հավաքին հայտարարել է Արտաքին գործերի նախարար Զոհրաբ Մնացականյանը:
Նախարարը նշել է, որ Ադրբեջանի կողմից ռազմաքաղաքական հավասարակշռությունը խախտելու փորձերը, որոնք մինչ օրս արտահայտվել են նաև ուժի կիրառմամբ, տարածաշրջանային անվտանգության և խաղաղության սպառնալիք են:
«Լարվածության պայմաններում բանակցություններ վարելու Ադրբեջանի ջանքերը խոչընդոտում են խաղաղությանը նպաստող միջավայրի ձևավորմանը և ըստ այդմ՝ չեն նպաստում հիմնախնդրի տևական և համապարփակ կարգավորմանը: Ադրբեջանն իր անփոփոխ հայատյաց քաղաքականությամբ շարունակում է մնալ Արցախի ժողովրդի գոյության սպառնալիքը: Խաղաղությունն այլընտրանք չունի և ՀՀ-ն և Արցախն ունեն բավարար ուժ խաղաղության ապահովման համար»,- ասել է ՀՀ արտաքին գործերի նախարարը:
Զոհրաբ Մնացականյանը դիվանագիտական ներկայացուցչությունների ղեկավարների հավաքին ներկայացրել է Հայաստանի արտաքին քաղաքականության երեք հիմնարար սկզբունքները.
«Այս սկզբունքները կապահովեն մեր դիվանագիտության հարատև և շարունակական ընթացքը: Առաջին սկզբունքը ինքնիշխանությունն է: Այս սկզբունքի առանցքը հայասատանակենտրոնությունն է՝ առաջին հերթին Հայաստանի պետական շահերի, քաղաքացիների պաշտպանությունը»:
Երկրորդ սկզբունքն, ըստ նախարար Մնացականյանի, համահայկականությունն է. «Սա և՛ սկզբունք է, և՛ միջոց: Այս սկզբունքն արտացոլում է ոչ միայն Հայաստանին՝ որպես հայության կենտրոն, այլև հայկական դիվանագիտության կողմից ՀՀ-ն, Արցախը և աշխարհասփյուռ հայությունը որպես մեկ միասնական միավոր դիտարկելու անհրաժեշտությունը»,- ասել է Մնացականյանը:
Երրորդ սկզբունքն էլ փոխգործակցությունն է. «Հայաստանը պատրաստ է իրավահավասար և փոխշահավետ գործակցության ցանկացած պետության հետ: Հայաստանն աշխատելու է տարածաշրջանային խաղաղության, անվտանգության և զարգացման ուղղությամբ և այս նպատակով համագործակցելու է բարեկամ պետությունների և բոլոր մյուս գործընկերների հետ»,- ասել է արտաքին գործերի նախարարը:
Նա նաև նշել է, որ Հայաստանը շարունակելու է իր ներդրումն ունենալ միջազգային անվտանգության և միջազգային համագործակցության ոլորտում՝ նպաստելով գլոբալ հիմնախնդիրների լուծմանը և սերտ համագործակցելով բոլոր գործընկերների հետ երկկողմ և բազմակողմ հնարավոր բոլոր ձևաչափերով:


Մեկնաբանություններ

Համընկնող լուրեր