Տեսանյութ. «Պետք ա՝ կդադարեցնեմ շինարարությունը, մեղքը իրենց վիզը»
Կարող եմ ասել, որ օրենքի առաջ բոլորը հավասար են, մեղադրանք է առաջադրվել Աբովյանի քաղաքապետին, իրավական մարմինների տիրույթում է, թող քննեն եւ իրենց կարծիքը ներկայացնեն: Այս մասին այսօր՝ ԱԺ-ում լրագրողների հետ զրույցում նշեց ԲՀԿ առաջնորդ Գագիկ Ծառուկյանը՝ անդրադառնալով նրան, որ մեղադրանք է առաջադրվել Աբովյանի քաղաքապետ Վահագն Գեւորգյանին՝ Աբովյանում առանց օրինական հիմքերի բազմաբնակարան շենքերի կառուցապատում սկսելու համար:Դիտարկմանը, որ այդ շենքերի կառուցումը կապվում է հենց Գագիկ Ծառուկյանի անվան հետ, ԲՀԿ ղեկավարն ասաց. «Ես արդեն 4 հատի տեղը 20 շենք եմ կառուցել: Նախնական քայլերը կատարել եմ, ում հետ հարցեր եղել է, եթե եղել են հողատարածքներ, բոլորի հետ պայմանավորվածություն եղել է:
Հիմնական, քանի որ եղել է հեղափոխություն, տնտեսական հեղափոխություն, դա միայն խոսքերով չի, այլ պետք է քայլեր արվեն, որ մարդիկ ներգաղթի ժամանակ բնակվելու տեղ ունենային: Ես ցանկացել եմ օրինակ ծառայել, որ միայն այսկերպ է հնարավոր, որ ներգաղթ լինի, մարդիկ գան: Հիմա պատճառներ են սարքում, պրոբլեմներ են սարքում, մեղքը իրենց վիզը: Ես իմ խոսքերին տեր եմ եղել, կատարում եմ»,-ասաց Ծառուկյանը:
Նա նաեւ հավելեց. «Այսօր ամբողջ պետությունդ չի կարողացել 6 ամսվա մեջ 20 հատ բարձրահարկ շենք կառուցել, որ գնացել տեսել է: Հիմա գնան ասեն՝ կեսը ապօրինի շինություն է, 20 սմ դուրս է եկել… պետք ա, կդադարեցնեմ, ես ոչ մի խնդիր չունեմ: Ես իմ քայլը կատարել եմ»:
Նա հավաստիացրեց, որ ամեն ինչ օրենքի տիրույթում է, օրինական է, թող իրավապահները քննեն:
Հարցին, թե աջակցելո՞ւ է Վահագն Գեւորգյանին, Ծառուկյանը պատասխանեց. «Օրենքի առաջ ոչ մեկը չի կարող աջակցել, գնում է քննություն, մեղավորները պատժվում են, անմեղները արդարացվում են»:
