Կորոնավիրուսային ինֆեկցիաները «որոշակի» շրջափուլ ունեն. կորոնավիրուսի համավարակի ավարտի ժամկետը
Ռուսաստանում կորոնավիրուսային ինֆեկցիայի տարածումը կարող է ավարտվել հունիսի կեսին: Այս մասին հայտնել է Ն. Ի. Պիրոգովի անվան ռուսական ազգային հետազոտական բժշկական համալսարանի հոսպիտալային թերապիայի ամբիոնի վարիչ, ՌԳԱ ակադեմիկոս Ալեքսանդր Չուչալինը՝ «Ռոսիա 1» հեռուստաալիքի «Վեստի Դմիտրի Կիսելյովի հետ» ծրագրի եթերում, փոխանցում է ՌԲԿ-ն: Կորոնավիրուսային ինֆեկցիաները «որոշակի» շրջափուլ ունեն, նշել է Չուչալինը: Նրա խոսքով՝ նախորդ նման բռնկումները, այդ թվում՝ 2002 թվականին SARS-ը (շնչառական վիրուսային հիվանդություն, որն առաջացնում է SARS-CoV-ը – խմբ.) եւ 2013 թվականին MERS-ը (մերձավորարեւելյան շնչառական կորոնավիրուսային համախտանիշ – խմբ.) տեւել են 3,5 ամիս:
«Ուստի եկեք հաշվենք՝ մարտ, ապրիլ, մայիս, 3,5 ամիս: Գրեթե հունիսի կեսին մենք պետք է սպասենք, որ այս խնդիրը կվերանա»,- ասել է Չուչալինը:
Բարենպաստ սցենարի դեպքում Ռուսաստանում կորոնավիրուսի համաճարակը կավարտվի հունիսին, ավելի վաղ ասել էր «Ռոսպոտրեբնադզորի» Համաճարակաբանության կենտրոնական ԳՀԻ տնօրենի խորհրդական, ՌԳԱ ակադեմիկոս Վիկտոր Մալեեւը: Ընդ որում, նրա խոսքով, հիվանդության վերջնական հաղթահարման մասին հնարավոր կլինի խոսել միայն այն ժամանակ, երբ ստեղծվի պատվաստանյութը: Այն, որ կորոնավիրուսային ինֆեկցիայի տարածման անկումը հունիսից շուտ չպետք է սպասել, համաձայն է նաեւ Ն. Գամալեի անվան Համաճարակաբանության եւ մանրէաբանության ԳՀԻ գլխավոր գիտաշխատակից, վիրուսաբան Վիկտոր Զուեւը:
Օպերատիվ շտաբի վերջին տվյալներով՝ Ռուսաստանում գրանցվել է կորոնավիրուսային ինֆեկցիայով վարակման 80,9 հազար դեպք: Հիվանդացածներից 6,7 հազարն ապաքինվել է, 747-ը՝ մահացել:
