Պարետի նոր որոշմամբ այսօրվանից ուժի մեջ են մտնելու կիրառվող սահմանափակումներում մի շարք փոփոխություններ
Պարետի նոր որոշմամբ մայիսի 18-ից ուժի մեջ են մտնելու արտակարգ դրության ընթացքում կիրառվող սահմանափակումներում մի շարք փոփոխություններ։Ըստ այդմ, այսօրվանից իր աշխատանքը կսկսի Երեւանի մետրոպոլիտենը եւ հանրային տրանսպորտը: Մետրոպոլիտենում երթեւեկությունը թույլատրվելու է բացառապես անհատական պաշտպանության միջոցներով՝ դիմակով եւ ձեռնոցներով։ Սպասասրահներում նշանակվելու են ուղեւորների նստեցման եւ իջեցման համար պատասխանատուներ, որոնք կազմակերպելու են ուղեւորների արագ, անվտանգ ու անխափան ուղեւորափոխադրումը:
Մետրոպոլիտենի նախասրահներում եւ բոլոր վագոններում առկա են լինելու բավարար թվով ալկոհոլային հիմքով ձեռքերի ախտահանիչներ։ Մետրոպոլիտենն աշխատելու է իր գրաֆիկի համաձայն ՝ ժամը 07։00-ից մինչ 23։00-ն։
Ինչ վերաբերում է հանրային տրանսպորտին, ապա ի թիվս թվարկվածի, այստեղ արգելվում է կանգնած ուղեւորների փոխադրումը, բացի 9 մետրից ավել երկարություն ունեցող տրանսպորտային միջոցների, ուղեւորների միջեւ պահպանվում է առնվազն 1 մետր հեռավորություն: Ապահովվելու է բոլոր տրանսպորտային միջոցներում վճարման համար հատուկ արկղեր կամ այլ հարմարեցված տարաներ՝ կանխիկ փողի հետ շփումը հնարավորինս նվազեցնելու նպատակով։ Վարորդներին օրական երկու անգամ ջերմաչափում են:
Այսօրվանից իրենց աշխատանքները կարող են սկսել նաեւ վարսավիրանոցներն ու գեղեցկության սրահները: Այստեղ սպասարկումն իրականացվում է բացառապես նախապես հեռախոսով կամ առցանց հերթագրման դեպքում: Միաժամանակ անհրաժեշտ է պահպանել հաճախորդների սպասարկման միջեւ առնվազն 20 րոպեանոց ընդմիջումներ:
Այսօրվանից կգործեն նաեւ հանրային սննդի օբյեկտները: Այստեղ նպատակահարմար է ընդհանուր առմամբ մեկանգամյա օգտագործման սպասքի կիրառումը կամ բազմակի կիրառման սպասքի օգտագործումը՝ պարտադիր ախտահանման պայմանով: Աշխատակիցներին արգելվում է աշխատանքային վայրը լքելը ընդմիջման նպատակով: Բոլոր հաջախորդների ջերմությունը պետք է չափել: Հանրային սննդի օբյեկտներում արգելվում է 5 հոգուց ավել անձանց մասնակցությամբ միջոցառումների իրականացումը: Արգելվում է հաճախորդների սպասարկման ընդհանուր տարածքում յուրաքանչյուր 20 քառ. մետրի հաշվարկով 10-ից ավելի հաճախորդի միաժամանակյա ներկայությունը:
Այսօրվանից բացվում են նաեւ մարզասրահները, որտեղ նույնպես նոր կանոններ են գործելու: Մասնավորապես, մարզվելուց առաջ և հետո ցնցուղի ընդունումն իրականացվում է տանը, մարզասարքերը տեղադրվում են միմյանցից առնվազն 2 մետր հեռավորության վրա:
Մայիսի 18-ից բացվում են նաեւ առեւտրային կենտրոնները, մոլերը: Այստեղ տաղավարներում իրարից մեկ մետր հեռավորությամբ գծանշումներ կարվեն: Յուրաքանչյուր օր ժամը 10։00-12։00-ը սպասարկվում են միայն կենսաթոշակային տարիքի անձինք:
Այսօրվանից աշխատելու են նաեւ գրասենյակային պայմաններում տնտեսական գործունեության օբյեկտները, փակ արտադրամասերը, շինհրապարակներում աշխատողների համար եւս նոր կանոններ են գործելու:
Վերաբացվելու են բացօթյա պատմամշակութային վայրերը:
Հանվելու է մշակութային ստեղծագործական խմբերի գործունեության սահմանափակումը, սակայն բացառապես փոքր խմբերով փորձերի համար:
Նկատենք, որ մանկապարտեզները կբացվեն ոչ թե այսօրվանից, ինչպես նախապես հայտարարվել էր, այլ մայիսի 20-ից:
