ԵԱՏՄ տարածքում կենսաթոշակի ապահովման մասին համաձայնագիրը Պետդումա է մտել

Պայմանագիրը կնքվել է 2019–ի դեկտեմբերի 20-ին Սանկտ Պետերբուրգում Հայաստանի, Բելառուսի, Ղազախստանի, Ղրղրզստանի ու Ռուսաստանի նախագահների կողմից։ Օրինագծի բացատրական գրության մեջ նշված է, որ փաստաթուղթը միտված է կենսաթոշակային ոլորտում աշխատողների հավասար իրավունքների ապահովմանը, ԵԱՏՄ երկրների տարածքում իրենց ձեռքբերած կենսաթոշակային իրավունքների պաշտպանությանը, նաև կենսաթոշակային ապահովման ոլորտում համագործակցության զարգացմանը։
Համաձայնագիրը երաշխավորում է, որ աշխատակիցներին չեն կարող մերժել կենսաթոշակ նշանակելու կամ վճարելու հարցում այն հիման վրա, որ նրանք բնակվում են ԵԱՏՄ այլ երկրի տարածքում։
«Կենսաթոշակի չափը չի կարող նվազեցվել, վճարումը չի կարող կասեցվել կամ դադարեցվել այն պատճառով, որ աշխատողն այլ անդամ երկրի տարածքում է բնակվում», - նշված է փաստաթղթում։
ՌԴ կառավարության գնահատմամբ՝ փաստաթղթի իրականացումը լրացուցիչ բյուջետային միջոցներ չի պահանջի․ այն իրականացվում է ՌԴ Կենսաթոշակային հիմնադրամի ծախսերի ընդհանուր ծավալի սահմաններում։