Բաքվի համար անհասկանալի է, թե ինչի հիման վրա է Ռուսաստանը շարունակում ինտենսիվ կերպով զինել Հայաստանին
Ադրբեջանը դեռ սպասում է, որ Ռուսաստանը պարզաբանումներ կտա Հայաստան ռազմական բեռներ մատակարարելու վերաբերյալ։Ադրբեջանի նախագահի վարչակազմի ներկայացուցիչ Հիքմեթ Հաջիևն ասել է, որ ադրբեջանական կողմին չի բավարարել այն պարզաբանումը, ըստ որի` ինքնաթիռներով շինանյութ է տեղափոխվել Հայաստանում գտնվող ռուսական ռազմակայան։ Ադրբեջանական ԶԼՄ-ների փոխանցմամբ՝ Հաջիևն ասել է, որ բեռները կարելի է այդ տարբերակներով մատակարարել, դրանից ելնելով՝ անհասկանալի է՝ ինչի հիման վրա է Ռուսաստանը շարունակում ինտենսիվ կերպով զինել Հայաստանին։
Ավելի վաղ ՌԴ պաշտպանության նախարար Սերգեյ Շոյգուն Բաքվում ասել էր, որ ռուսական 102-րդ ռազմակայանում սոցիալական օբյեկտների շինարարություն է ընթանում, բեռնափոխադրումների աննշան ակտիվությունը դրա հետ է կապված։ Շոյգուն նշել էր, որ նաև զորակոչ է իրականացվում, ինչը նույնպես փոխադրումների ծավալի աճի է հանգեցրել։
Ավելի վաղ Բաքվում հայտնել էին, որ Ռուսաստանի նախագահ Վլադիմիր Պուտինի հետ հեռախոսազրույցի ժամանակ Ադրբեջանի նախագահը քննարկել է Ռուսաստանից Հայաստան ռազմական բեռների տեղափոխման հարցը: Ըստ այդ հաղորդագրությունների` Ալիևն ասել է, որ հուլիսյան իրադարձություններից հետո Ղազախստանի, Թուրքմենստանի և Իրանի օդային տարածքով Ռուսաստանից Հայաստան տեղափոխված ռազմական բեռների ծավալը գերազանցել է 400 տոննան:
