Եվրոպական խորհրդարան․ Սահմանել պատժամիջոցներ Բելառուսի նախագահի և Նավալնիին թունավորողների դեմ
![](https://iravaban.net/wp-content/uploads/2018/01/1213.jpg)
․ Եվրոպական խորհրդարանը դատապարտում է Բելառուսի իշխանություններին՝ խաղաղ ցույցերը բռնի ճնշելու համար։
․ Եվրախորհրդարանականները կոչ են անում անհապաղ սկսել Նավալնիին թունավորելու գործի միջազգային հետաքննությունը։
․ Եվրախորհրդարանականները կոչ են անում Բելառուսում անցկացնել նոր նախագահական ընտրություններ, և ԵՄ-ին կոչ են անում սանկցիա կիրառել նախագահ Լուկաշենկոյի և Ալեքսեյ Նավալնիի թունավորումը կատարողների նկատմամբ։
Ահա այսպիսի կետեր են պարունակում այսօր Եվրոպական խորհրդարանում Բելառուսի և Նավալնիի վերաբերյալ ընդունված բանաձևերում։
Իրավիճակը Բելառուսում
574 կողմ, 37 դեմ, 82 ձեռնպահ ձայների հարաբերակցությամբ ընդունված բանաձևում Եվրախորհրդարանը մերժում է այս տարվա օգոստոսի 9-ին Բելառուսում անցկացվող «այսպես կոչված նախագահական ընտրությունների» պաշտոնական արդյունքները, քանի որ այս ընտրություններն անցկացվել են «միջազգայնորեն ճանաչված բոլոր ստանդարտների աղաղակող խախտումներով»: Նոյեմբերի 5-ին գործող «ավտորիտար» առաջնորդ Ալեքսանդր Լուկաշենկոյի պաշտոնավարման ժամկետի ավարտից հետո խորհրդարանն այլևս չի ճանաչի նրան որպես երկրի նախագահ:
Միևնույն ժամանակ, եվրախորհրդարանականները ողջունում են վերջերս ստեղծված Համակարգող խորհուրդը՝ որպես «Բելառուսում ժողովրդավարական փոփոխություն պահանջող մարդկանց միջանկյալ ներկայացուցչություն»։ Նրանք նաև կրկնում են բազմաթիվ հորդորները, որպեսզի միջազգային վերահսկողության ներքո հնարավորինս արագ տեղի ունենան նոր, ազատ և արդար ընտրություններ:
«ԵՄ պատժամիջոցները դաժան ռեժիմի և դրա ղեկավարների դեմ»
Եվրախորհրդարանականները կոչ են անում ԵՄ-ին պատժամիջոցներ կիրառել ընտրությունների արդյունքները կեղծելու և Բելառուսում բռնաճնշումների համար պատասխանատու անձանց խմբի նկատմամբ, ներառյալ Նախագահ Լուկաշենկոյի, և ԵՄ խորհրդում անդամ երկրներին կոչ են անում այդ սահմանափակող միջոցներն իրականացնել առանց հապաղելու։
«Կարևոր ներդրում բելառուս կանանց կողմից»
Բանաձևը, ի վերջո, ընդգծում է ընդդիմության հայտնի կին անդամների՝ Սվետլանա Տիխանովսկայայի, Վերանիկա Ցապկալայի և Մարիա Կալեսնիկովայի գլխավորությամբ անցկացրած բողոքների ժամանակ կատարած կարևոր ներդրումը:
«Իրավիճակը Ռուսաստանում և Ալեքսեյ Նավալնիի թունավորման դեպքը»
Առանձին բանաձևում, որը նույնպես ընդունվեց այօր՝ 532 կողմ, 84 դեմ և 72 ձեռնպահ ձայներով, խորհրդարանը խստորեն դատապարտում է նյարդապարալիտիկ գործակալի միջոցով ռուս հայտնի ընդդիմադիր քաղաքական գործիչ և հակակոռուպցիոն ակտիվիստ Ալեքսեյ Նավալնիի սպանության փորձը: Տեքստում նշվում է, որ օգտագործված թույնը, որը պատկանում է «Նովիչոկ խմբին», կարող է մշակվել միայն պետական սեփականություն հանդիսացող ռազմական լաբորատորիաներում և այն հնարավոր չէ ձեռք բերել մասնավոր անձանց կողմից, ինչը վկայում է այն մասին, որ հարձակման հետևում կանգնած են եղել Ռուսաստանի իշխանությունները: Այդուհանդերձ, ըստ բանաձևի, եթե որևէ մեկ ուրիշը պատասխանատվության ենթարկվի, դա, միևնույն է, կլինի Ռուսաստանի միջազգային իրավական պարտավորությունների բացահայտ խախտում:
Եվրախորհրդարանականներն ընդգծում են, որ Նավալնիի սպանության փորձը մաս է կազմում Ռուսաստանում այլախոհ ձայները լռեցնելու համակարգային փորձի, մասնավորապես սեպտեմբերի 11-13-ին Ռուսաստանի տեղական և տարածաշրջանային լրացուցիչ ընտրությունների վրա ազդելու նպատակով:
«Միջազգային հետաքննություն և ԵՄ պատժամիջոցներ»
Բանաձևը պահանջում է անհապաղ սկսել միջազգային հետաքննություն Նավալնիի գործի և քիմիական զենքի ոլորտում Ռուսաստանի կողմից ստանձնած միջազգային պարտավորությունների ենթադրյալ խախտումների վերաբերյալ, միևնույն ժամանակ Ռուսաստանի իշխանություններին հորդորում է լիովին համագործակցել նման հետաքննության հետ և պատասխանատվության ենթարկել մեղավորներին:
Այն նաև կոչ է անում ԵՄ անդամ երկրներին ակտիվ դիրքորոշում ցուցաբերել այդ հարցի շուրջ, ինչպիսիք են Ռուսաստանի նկատմամբ ԵՄ-ի հավակնոտ սահմանափակող միջոցառումների արագ կիրառումը և արդեն գործող միջոցառումների ամրապնդումը: Տեքստը կոչ է անում կիրառել պատժամիջոցների մեխանիզմներ, որոնք թույլ կտան կոռումպացված անձանց եվրոպական ակտիվները հավաքել և սառեցնել՝համաձայն Ալեքսեյ Նավալնիի հակակոռուպցիոն հիմնադրամի արդյունքների: