Շուշիում վիրավորված ռուս լրագրողը դուրս է եկել կոմայից, խոսում է, սակայն առողջական վիճակը շարունակում է մնալ կայուն ծանր
Վիրավոր լրագրողի վիճակը շարունակում է մնալ կայուն ծանր, բայց նա արդեն խոսում է, Կոտենոկի տելեգրամ–ալիքում էլ հաղորդագրություններ են հայտնվում նրա անունից։Ադրբեջանական հրթիռակոծության հետևանքով Շուշիում վիրավորված ռուս լրագրող Յուրի Կոտենոկը կոմայից դուրս է եկել։ Տեղեկությունը հաստատեց «Էրեբունի» բժշկական կենտրոնի մամուլի խոսնակ Շուշան Հունանյանը։
«Լրագրողը գիտակցության է եկել, անջատվել է արհեստական շնչառական ապարատից։ Խոսում է, սակայն առողջական վիճակը շարունակում է մնալ կայուն ծանր»,– ասաց Հունանյանը։
Կոտենոկ տելեգրամ–ալիքում այսօր արդեն երկու հաղորդագրություն է հայտնվել։ Մեկում գրված է, որ նա կոմայից դուրս է եկել, իսկ մյուսը Շուշիի հրթիռակոծության մասին է. «Հաղորդագրություն Կոտենոկից. հարվածը 100%–ով կանխամտածված էր, մինչ մեր գալը եկեղեցու վրա մոտ 20 րոպե անօդաչու էր պտտվում, երբ մենք հայտնվեցինք ներսում, գրեթե անմիջապես հարված հասցվեց»:
