Ընթացել է ամբողջությամբ հասկանալի խոսակցություն. ՀՀ-ում Բելառուսի դեսպանատունը՝ Սարգսյան-Լուկաշենկո ձայնագրության մասին
Բելառուսի նախագահ Ալեքսանդր Լուկաշենկոյի և ՀՀ 3-րդ նախագահ Սերժ Սարգսյանի երեկ տարածված ձայնագրության վերաբերյալ Tert.am-ը մեկնաբանություն է խնդրել Հայաստանում Բելառուսի դեսպանատնից:«Ինչ մեկնաբանություններ կարող են լինել: Այնտեղ ընթացել է ամբողջությամբ հասկանալի խոսակցություն երկու պետությունների միջև, որոնք փորձում են կարգավորել կոնֆլիկտը: Դրա համար բոլոր մեկնաբանությունների համար դիմեք հայ գործընկերներին»,- ասացին Բելառուսի դեսպանատնից:
Հիշեցնենք, որ Տելեգրամի «Բաղրամյան 26» ալիքը նախօրեին տարածել է ՀՀ 3-րդ նախագահ Սերժ Սարգսյանի և Բելառուսի նախագահ Ալեքսանդր Լուկաշենկոյի զրույցի ձայնագրությունը։ Զրուցակիցները խոսում են Արցախի հարցի մասին։
«Տուր նրան շրջանները (Ղարաբաղի), Ալիևը կվճարի, նա քեզ առաջին փուլի համար 5 մլրդ դոլար է խոստացել»,-ասում է Լուկաշենկոն, ինչին ի պատասխան Սերժ Սարգսյանը նշում է. «Ես նրան 6 մլրդ եմ տալիս, թող հրաժարվի 7 շրջաններից»:
Ձայնագրության վերաբերյալ նաև ՀՀ 3-րդ նախագահի գրասենյակն էր հայտարարությամբ հանդես եկել, որում ասվում էր. «Ձայնագրությունն ընդունում ենք որպես փաստ և զերծ մնում մեկնաբանություններից: Փակ ձևաչափով նիստերը մեկնաբանման ենթակա չեն»:
