Ադրբեջանցիները զինված առաջ են շարժվել ու փորձել իրենց դիրքերը մոտ 400 մետր առաջ տալ. միջամտել են ռուս խաղաղապահները ու հետ մղել
Ադրբեջանցիներն Արցախի Մարտակերտի շրջանի Նոր Ղազանչի գյուղի հարակից իրենց դիրքից վերջին երկու օրերին երկու անգամ փորձել են մինչեւ 400 մետր առաջանալ ու հետ են մղվել։ Տեղեկությունը «Փաստինֆո»-ի հետ զրույցում հայտնեց Մարտակերտի շրջանի վարչակազմի ղեկավար Հայկ Բախշիյանը:«Այո, կրկին առաջ են եկել, հետ ենք տվել, նորից են առաջացել հիմա էլի հետ են գնում»,–ասաց Բախշիյանը։
Վարչակազմի ղեկավարի փոխանցմամբ՝ առաջանալու առաջին դեպքը գրանցվել է ապրիլի 25-ին. ադրբեջանցիները առաջացել էին 370-400 մետր, եղել են զինված ու շարժվել վարելահողերի ուղղությամբ։ Բանակցությունների արդյունքում՝ ապրիլի 27–ի առավոտյան, նրանք իրենց դիրքերը նույնչափ հետ էին տվել:
Երկրորդ փորձը գրանցվել է այսօր։
Մարտակերտի շրջանի վարչակազմի ղեկավարի փոխանցմամբ՝ ռուս խաղաղապահ ուժերի միջնորդությամբ և համագործակցության արդյունքում ադրբեջանական ուժերին հետ են ուղարկել։ Տարածքներ կան, որոնք խաղաղապահների դիտարկման ներքո չեն գտնվում, ուստի երբեմն ՊԲ-ն և վարչակազմի ղեկավարներն են զեկուցում խաղաղապահներին՝ թշնամու տեղաշարժի մասին։
«Տեղ կա իրենք չեն տեսնում մենք ենք իրենց տեղյակ պահում, դա համագործակցության արդյունքում է լինում։ Հետո բանակցություններ են վարել և հետ են գնում»։
