«Նրանք արթնացրին իմ միջի գազանին». ինչու թուրք քրեական «հեղինակությունը» որոշեց «մերկացնել» Էրդողանի շրջապատին և ում է դա ձեռնտու. «ՌԻԱ Նովոստի»
Թուրքիայում ներքաղաքական աղմկահարույց սկանդալ է առաջացել: Անցյալ տարեսկզբին երկրից փախած թուրք մաֆիոզ Սեդաթ Փեքերը YouTube-ում հրապարակում է աղմկահարույց տեսանյութեր, որոնցում պատմում է քրեական աշխարհի հետ թուրքական էլիտայի կապերի մասին, ինչպես նաև մեղադրում է նախագահ Էրդողանի շրջապատի պաշտոնյաներին սպանությունների, թմրաշրջանառության, կոռուպցիայի և այլ հանցագործությունների համար: Ո՞վ է կանգնած բլոգեր դարձած քրեական «հեղինակության» թիկունքին՝ պարզել է ՌԻԱ Նովոստի գործակալությունը: Քրեական «հեղինակության» բարձրացրած աղմուկը
«Ստուգե՛ք ինձ ստի դետեկտորի միջոցով, եթե սարքը ցույց տա, որ խաբում եմ, կտրե՛ք մատներս կամ ամբողջ դաստակս, խոստանո՛ւմ եմ»,- յուրաքանչյուր հոլովակում ասում է թուրք մաֆիոզը:
Նա դեռ 8 տեսանյութ է հրապարակել, իսկ նկարահանել է 12-ը: Յուրաքանչյուր հոլովակ ունի միլիոնավոր դիտումներ: Նշվում է, որ երկրի ամեն անկյունում՝ սրճարաններում, պոլիկլինիկաներում, գեղեցկության սրահներում, ամենուր մարդիկ խոսում են Փեքերի բացահայտումների մասին:
49-ամյա Փեքերը հայտնի էր Թուրքիայում դեռ մինչ բլոգերությամբ զբաղվելը: Նրան բազմիցս դատել են սպանությունների ու քրեական գործունեության համար: Ընդհանուր առմամբ, նա ճաղերի ետևում է անցկացրել 16 տարի: Հիմա, ըստ լուրերի, նա թաքնվում է Դուբայում:
Ինքը՝ Փեքերը նշել է, որ քաղաքականություն չի ցանկանում մտնել, իսկ «Պանդորայի արկղը» բացել է արդարության զգացումից ելնելով: Նա Էրդողանի օգնականներին մեղադրում է տարատեսակ մեղքերի համար՝ սպանություն, կոռուպցիա, թմրաշրջանառություն: Հատկապես նրա «թիրախում» է Թուրքիայի ներքին գործերի նախարար Սուլեյման Սոյլուն, որը, ըստ նրա, «երազում է նախագահի աթոռի մասին»:
Նշվում է, որ հենց Սոյլուն է համոզել նրան փախչել երկրից՝ նախազգուշացնելով սպասվող հետաքննության մասին: Միևնույն ժամանակ, նախարարը երաշխավորել էր, որ որոշ ժամանակ անց նա կարող է հանգիստ վերադառնալ հայրենիք, սակայն հակառակն է ստացվել. Փեքերի տուն են ներխուժել զինված անձինք, երբ տանն են եղել նրա կինն ու երեք անչափահաս երեխաները, և զենքը պահել ընտանիքի անդամների վրա:
«Ես խելոք, հանգիստ նստած էի, գիրք էի կարդում, սակայն ինձ անհանգստացրին և իմ միջի գազանին արթնացրին»,- բացատրել է Փեքերը:
Ձեռքերը հեռո՛ւ Էրդողանից
Նրա բացահայտումներից բաժին է հասել նաև Թուրքիայի ՆԳ նախկին նախարար Մեհմեթ Աղարին՝ ըստ քրեական «հեղինակության»՝ «մոխրագույն կարդինալին», որն իրեն պատվիրել էր ինչ որ կարևոր մեկի սպանել Կիպրոսում: Ճիշտ է՝ հետագայում դա ուրիշն է արել...
Մինչդեռ Էրդողանին Փեքերը «մեծ եղբայր» է անվանում և նախազգուշացնում՝ երկրի ղեկավարին ցանկանում են տապալել: Անձամբ նախագահին դեռ չի թիրախավորում, սակայն թիրախավորում է նրա ընտանիքի անդամներին, առաջին հերթին՝ նրա փեսային՝ ֆինանսների նախկին նախարար Բերաթ Ալբայրաքին: Փեքերը վստահեցնում է, որ Թուրքիայում Ալբայրաքի և նրա եղբայր Սերհաթի գլխավորությամբ գործում է հզոր խմբավորում, որն ազդում է երկրում քաղաքական գործընթացների վրա:
Նշվում է, որ Սուլեյման Սոյլուի վարկանիշը բարձրացել էր հանրության շրջանում, նա անգամ երկրում իշխող «Արդարություն և զարգացում» կուսակցության երկրորդ ամենապոպուլյար մարդն է՝ ըստ հարցման՝ հետ մնալով Էրդողանից ընդամենը մի քանի տոկոսով: Իսկ այժմ՝ Փեքերի բացահայտումներից հետո, նրա փառքից հետք անգամ չի մնացել, նրան համարում են քաղաքական դիակ: Չնայած որ Էրդողանն այս ամենի ֆոնին իր աջակցությունն է հայտնել Սոյլուին, շատերը կարծում են, որ նախարարի հրաժարականը ժամանակի հարց է:
Ո՞ւմ շահերից է բխում այս ամենը
Ըստ Թուրքիայի բնակիչների՝ Փեքերի բացահայտումներն ուղղված Սոյլուին Էրդողանի շահերից են բխում: Դա ձեռնտու է նաև նրա փեսային՝ Ալբայրաքին, քանի որ վարկաբեկված ՆԳ նախարարին հեշտ է պաշտոնից ազատելը: Եթե նախագահը նրան պարզապես պաշտոնանկ աներ, Սոյլուի վարկանիշը կբարձրանար, և նա կունենար բնակչության աջակցությունը:
Իշխանամետ մամուլն էլ գրում է, որ ընդդիմադիր քաղաքական գործիչները Փեքերի հետ միասին գործում են ԱՄՆ շահերից ելնելով, իսկ ՆԳ նախարարի վրա ներկայիս հարձակումը կազմակերպված է Արևմուտքի կողմից:
Ո՞վ է կանգնած նրա ետևում, դեռ հայտնի չէ, բայց այն հանգամանքը, որ երկրում իշխող կուսակցության վարկանիշը նվազել է, փաստ է:
tert.am
