Պետք է անցնենք պրոֆեսիոնալ բանակի` պայմանագրայինը պրոֆեսիոնալը չէ.Քայլ առ քայլ գնում ենք հայ-ադրբեջանական սահմանին ստեղծված իրավիճակի հանգուցալուծմանը
Հայաստանի իշխանությունն այս օրերին շատ ակտիվ քննարկումների մեջ է ռուսական կողմի հետ` հայ-ադրբեջանական սահմանին ստեղծված իրավիճակի լուծման հարցով։ Քարոզարշավի շրջանակներում Գեղարքունիքի մարզի Ճամբարակ համայնքում տեղի բնակիչների հետ հանդիպման ժամանակ այս մասին ասաց ՀՀ վարչապետի պաշտոնակատար Նիկոլ Փաշինյանը։«Գեղարքունիքի մարզում և ընդհանրապես Սոթք, Խոզնավար հատվածում ստեղծված իրավիճակի առնչությամբ մեր դիրքորոշումը հայտնել ենք. խնդիրը պետք է լուծվի խաղաղ ճանապարհով, միջազգային մեր գործընկերների ներգրավմամբ։ Ռուսաստանի մեր գործընկերները լայնորեն ներգրավված են խնդրի լուծման հարցում»,–ասաց Փաշինյանը։
Նրա խոսքով` քայլ առ քայլ գնում են խնդրի լուծմանը։ Փաշինյանը նշեց, որ համագործակցում են նաև միջազգային գործընկերների հետ։
Սակայն, ըստ Փաշինյանի, անվտանգության խնդիրները պետք է լուծվեն նաև մեր բանակի հզորացմամբ։ Նա նշում է, որ պետք է անցնենք պրոֆեսիոնալ բանակի` պայմանագրայինը պրոֆեսիոնալը չի։
«Զինվորը պետք է ամբողջ օրը ոչ թե կենցաղով զբաղվի, այլ իր գիտելիքները մեծացնելու ուղղությամբ, սակայն սրա համար պետք է աշխատավարձը բարձրացնենք, զինանոցը համալրենք»,–ասաց Փաշինյանը։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
