Մենք չենք կարող թույլ տալ, որ Չինաստանը և Ռուսաստանը վերահսկեն իրավիճակը Աֆղանստանում.Բորել
ԵՄ արտաքին և անվտանգության քաղաքականության հարցերով գերագույն հանձնակատար Ժոզեպ Բորելը կարծում է, որ ԵՄ -ն չի կարող թույլ տալ Ռուսաստանին և Չինաստանին վերահսկել իրավիճակն Աֆղանստանում։«Մենք չենք կարող թույլ տալ, որ Չինաստանը և Ռուսաստանի Դաշնությունը վերահսկեն իրավիճակը Աֆղանստանում», – ասել է Բորելը՝ ելույթ ունենալով Եվրախորհրդարանի անդամների առջև:
Նրա խոսքով՝ այժմ քննարկվում է Աֆղանստանի ապագան, ազգային միասնության կառավարության հնարավոր ձևավորումը, որին կարող են մասնակցել տարբեր քաղաքական ուժեր, այդ թվում`նախկին կառավարության ներկայացուցիչները:
Նա ընդգծել է, որ երկրում ստեղծված իրավիճակը իսկական ողբերգություն է դարձել ինչպես Աֆղանստանի, այնպես էլ միջազգային հանրության համար:
«Մենք կանգնած ենք Աֆղանստանում բոլորովին նոր ողբերգական իրողության առջև, սա իսկական աղետ է աֆղանների, Արևմուտքի հեղինակության, միջազգային հարաբերությունների զարգացման համար», – ավելացրել է Բորելը:
Աֆղանստանում իրավիճակը սրվել է հատկապես վերջին շաբաթներին, երբ թալիբները սկսեցին ինտենսիվ հարձակումը: Միակ նահանգը, որն այս պահին նրանց վերահսկողության տակ չէ, Փանջշիրն է ՝ Քաբուլից հյուսիս -արևելք: Օգոստոսի 15 -ին զինյալները մտան մայրաքաղաք և վերահսկողություն հաստատեցին նախագահական պալատի վրա: Աֆղանստանի նախագահ Աշրաֆ Հանին լքեց երկիրը ՝ պատճառաբանելով փախուստը «կոտորածը կանխելու» ցանկությամբ:
