Ադրբեջանական անցակետը չի գտնվում ՀՀ տարածքում,հնարավոր էր բանակցել, որ ՀՀ քաղաքացիների և բեռների նկատմամբ սահմանային հսկողություն չլիներ, բայց դրա գինը լինելու էր միջանցքային տրամաբանությունը
![](https://www.tert.am/news_images/1235/3704717_1/243714649_1387536798315211_130003959815723613_n.thumb.jpg)
«Ծանուցումը ստանալուց հետո մենք որոշում ենք կայացրել այդ հատվածով ուղղորդվել դեպի Կապան Աղվանի, Տաթև, Հալիձոր, Շինուհայր M2 ավտոճանապարհով և այդտեղով իրականացնել երթևեկությունը»,–ասաց նա։
Նիկոլ Փաշինյանը նշեց, որ այդ ավտոճանապարհը՝ Տաթև–Աղվանի հատվածը, որը մի քանի տասնյակ տարի անանցանելի է եղել, ասֆալտապատվել և շահագործման է հանձնվել նախորդ շաբաթ, և ինքը նախորդ շաբաթ դրանով գնացել է և վերադարձել է և ասաց, որ ստացել են որակյալ ճանապարհ։
Փաշինյանն ասաց, որ Ադրբեջանի երեկվա որոշումից հետո իրանական բեռնատարների համար իրադրությունը չի փոխվում, և նրանք կարող են երթևեկել նաև Տաթև–Աղվանի ճանապարհով։ Նա շեշտեց, որ ճանապարհը դրանից չի երկարում, ընդհակառակը, որակը հաշվի առնելով, նույնիսկ կրճատվում է ճանապարհը։ Նա հայտնեց, որ այլընտրանքային ճանապարհների շինարարության ծավալուն աշխատանքներ են իրականացվում և Երթևեկության տրամաբանության փոփոխության արդյունքում ոչ մի գյուղ չի կտրվում։
«Շահարկումներից խուսափելու համար պետք է հիշեցնեմ, որ ադրբեջանական անցակետը չի գտնվում ՀՀ տարածքում, խոսքը Էյվազլիի հատվածի մասին է, հիմա կարող է այլ հարց ծագել, որ հնարավոր չէր բանակցել, որ այդ ճանապարհին ՀՀ քաղաքացիների և բեռների նկատմամբ որևէ սահմանային հսկողություն չիրականացվեր․ հնարավոր էր, բայց դրա գինը լինելու էր միջանցքային տրամաբանությունը, ինչը անընդունելի էր մեզ համար»,–ասաց նա և նշեց, որ դա երբևէ չեն քննարկելու։
Նիկոլ Փաշինյանը նշեց, որ Հայաստանը շարունակում է հավատարիմ մնալ հայտարարությունների դրույթներին։ Նա նշեց, որ Գորիս–Կապան ավտոճանապարհին ՀՀ–ն նույնպես ըստ անհրաժեշտության անցման տեղերում կտեղադրի մաքսային-անձնագրային հսկողության կետեր։
«Այս ընթացքում, ուզում եմ ընդգծել, այս չափազանց կարևոր ժամանակահատվածում մեզ անհրաժեշտ է սառնասրտություն, ամուր նյարդեր։ Հայաստանի շուրջ նոր միջավայր է ձևավորվում, և մենք պետք է ամեն ինչ անենք, որ այդ միջավայրը լինի հնարավորինս համապատասխան մեր երկարաժամկետ ռազմավարական շահերին, և մենք գնում ենք այդ ճանապարհով»,–հավելեց նա։