Թուրքիան հետքայլ չի անի.Ռուսաստանին հաճոյանալու համար մենք չենք դադարեցնի զենքի վաճառքն Ուկրաինային
Թուրքիան հետ չի կանգնի Ուկրաինայի հետ զենքի գործարքներից, այդ թվում՝ լրացուցիչ մարտական անօդաչու թռչող սարքերի հնարավոր վաճառքից՝ չնայած Ռուսաստանի ուժեղ ճնշմանը։Bloomberg-ի հետ զրույցում Թուրքիայի նախագահի աշխատակազմի հասարակայնության հետ կապերի պատասխանատու Ֆահրեթթին Ալթունն ասել է, որ Կիևի և Անկարայի միջև ռազմական և պաշտպանական համագործակցությունը ուղղված չէ Ռուսաստանի դեմ, և որ այդ պայմանավորվածությունները չեն ընդհատվի Ռուսաստանին հաճոյանալու համար։ Ալթունը շեշտել է, որ 2017 թվականին Ռուսաստանից Ս-400 գնելու՝ Թուրքիայի որոշումը հանգեցրել է CAATSA-ի պատժամիջոցներին, սակայն Թուրքիան հետքայլ չի արել։ Նա նշել է, որ դա վերաբերում է նաև Ուկրաինայի հետ կնքված պայմանագրերին։
«Մենք համագործակցության համաձայնագրեր չենք ստորագրում՝ ուղղված այլ երկրի դեմ։ Ռուսաստանն առաջիններից էր, որ իմացավ այս մասին։ Այն պայմանագրերը, որոնք մենք կնքել և ստորագրելու ենք Ուկրաինայի հետ, ուղղակիորեն կապված չեն ներկայիս ճգնաժամի հետ»,- նշել է Ալթունը։
