Եթե Թուրքիան Վրաստանին և Ուկրաինային է փորձում «գցել»` ոչ ձեռնտու պայմաններ առաջարկելով, պատկերացրեք Հայաստանի վիճակը
Թուրքիայի հետ ազատ առևտրի գոտու համաձայնագիրը բարենպաստ չէ Ուկրաինայի համար. այս մասին դեռևս 2020 թ. ապրիլին Ուկրաինայում բնակվելու և գործունեություն ծավալելու ժամանակ հայտարարել էր Վրաստանի նախկին նախագահ և Օդեսայի շրջանային պետական վարչակազմի նախկին ղեկավար Միխեիլ Սահակաշվիլին:«Մենք ազատ առևտրի համաձայնագիր ենք ստորագրում Թուրքիայի հետ։ Դուք չեք կարող ստորագրել այն այսպես. մենք պետք է պաշտպանենք մեր շահերը, հենց ստորագրենք, և սա ուժի մեջ մտնի, կարող ենք ընդմիշտ հրաժեշտ տալ Ուկրաինայի թեթև արդյունաբերությանը։ Թուրքերը շատ խելացի են, նրանք գիտեն, որ դա մեզ, իրոք, պետք է քաղաքականապես»,- ասել էր նա։
Սահակաշվիլին նշել էր, որ թուրքերն ունեն իրենց շահերը: Նրա կարծիքով՝ Թուրքիայի նախագահ Ռեջեփ Թայիփ Էրդողանը «շատ սառն է իր երկրի շահերը պաշտպանելու հարցում»։
«Մի ժամանակ Վրաստանում ես այդպես հիմարացա: Մենք իսկապես ուզում էինք ասել. «Թուրքիայի հետ ստորագրեցինք ազատ առևտրի համաձայնագիր, ինչ ուրախություն»: Բայց երբ կարդացինք այնտեղ գրվածը, սարսափեցինք։ Բայց մենք արդեն ստորագրել էինք։ Ուստի խորհուրդ չեմ տալիս կրկնել նույն սխալը։ Դուք չեք կարող կուրորեն որևէ բան ստորագրել»,- ասել էր Վրաստանի նախկին նախագահը։
Թուրքիան և Ուկրաինան 2022 թ. փետրվարի 3-ին Ուկրաինայում ստորագրեցին Ազատ առևտրի համաձայնագիր: Ինչպես Ուկրաինան, այնպես էլ Վրաստանը, որոնք հակամարտության մեջ են ՌԴ-ի հետ, սերտ կապեր ունեն Թուրքիայի հետ: Ծավալապաշտ Թուրքիան դեմ է, նախ, ժամանակին Օսմանյան տիրույթ հանդիսացած Ղրիմի կցմանը Ռուսաստանին և հայտարարում է, որ «պաշտպանում է Ղրիմի թաթարների շահերը»` դրանով իսկ իր ախորժակը ցույց տալով թերակղզու նկատմամբ: Բացի դրանից՝ Թուրքիան Ուկրաինայի հետ կնքել է բազմաթիվ ռազմական, տնտեսական պայմանագրեր, մատակարարում է մեծ քանակությամբ ռազմական տեխնիկա:
Նույնը կարելի է ասել նաև Վրաստանի դեպքում. Թուրքիան տնտեսապես նվաճել է վրացական Աջարիայի շրջանը, երկրի տնտեսությունը խիստ կախվածության մեջ է ընկել թուրքական շուկայից:
Ելնելով Սահակաշվիլիի խոսքերից` կարելի է ենթադրել, որ եթե Թուրքիան «բարեկամ» Վրաստանին և Ուկրաինային է փորձում «գցել»` ոչ ձեռնտու պայմաններ առաջարկելով, ապա սարսափելի է անգամ պատկերացնել, թե ինչպիսի քաղաքականություն կորդեգրի իր բացահայտ թշնամու` Հայաստանի նկատմամբ, երբ «կարգավորվեն» հայ-թուրքական հարաբերությունները, բացվեն սահմանները, և թուրքական տնտեսությունը ներխուժի Հայաստան:
Նյութը՝ Yerkir.am-ի
