Այս ճգնաժամը կործանարար կլինի և՛ Ուկրաինայի, և՛ ՌԴ-ի համար. Ուկրաինայի արևելքում գտնվող ռուս զինվորականները չեն կարող համարվել խաղաղապահներ
ՄԱԿ-ի գլխավոր քարտուղար Անտոնիու Գուտերեշը հայտարարել է Ուկրաինայի արևելքում իրավիճակի հետագա սրացման վտանգի մասին:«Եկել է դեէսկալացիային, բանակցություններին ու երկխոսությանը վերադառնալու ժամանակը։ Կարծում եմ՝ ներկայիս ճգնաժամը կործանարար կլինի Ուկրաինայի և Ռուսաստանի համար»,-ասել է նա։
Գուտերեշը նշել է, որ Ուկրաինայի արևելքում գտնվող ռուս զինվորականները չեն կարող համարվել խաղաղապահներ, ինչը պնդում է Մոսկվան։ «Երբ մի պետության զորքերը մուտք են գործում այլ պետության տարածք առանց նրա համաձայնության, ապա նրանք չեզոք խաղաղապահներ չեն։ Նրանք ընդհանրապես խաղաղապահներ չեն»,-ասել է կազմակերպության ղեկավարը՝ հավելելով, որ ԴԺՀ-ի և ԼԺՀ-ի ճանաչմամբ Ռուսաստանը մահացու հարված է հասցրել Մինսկի համաձայնագրերին, խախտել Ուկրաինայի ինքնիշխանությունն ու տարածքային ամբողջականությունը։
Կրեմլի խոսնակ Դմիտրի Պեսկովն իր հերթին հայտնել է, որ իրավիճակը Դոնբասի շփման գծում առավելագույնս սրվել է։ «Ցանկացած ծրագրված մանր սադրանք կարող է հանգեցնել անուղղելի հետևանքների»,-ասել է նա։ Ռուսաստանի նախագահի մամուլի քարտուղարն ընդգծել է, որ նման ֆոնի վրա Ռուսաստանի՝ Ուկրաինա ենթադրյալ ներխուժման մասին Արևմուտքում հայտարարված ժամկետները սպառնում են վատ հետևանքներով։
