Առաջիկա 24-96 ժամվա ընթացքում ՌԴ-ն կարող է հարձակվել Կիևի վրա, առայժմ լուծում է լոգիստիկ խնդիրները
Կիևի ուղղությամբ Ռուսաստանի զարմանալիորեն քաոսային հարձակման հետևանքով հազարավոր զինվորներ և հարյուրավոր մեքենաներ մի քանի օր շարունակ մնացել են հյուսիս-արևմուտք ընկած ճանապարհներին, սակայն որոշ ռազմական վերլուծաբաններ կարծում են, որ Մոսկվան աստիճանաբար հաղթահարում է իր նյութատեխնիկական խնդիրները և կարող է հարձակում իրականացնել Ուկրաինայի մայրաքաղաքի ուղղությամբ այս օրերի ընթացքում, գրում է theguardian.com-ը:Վաշինգտոնում գործող Պատերազմի ուսումնասիրման ինստիտուտը (Institute for the Study of War) եզրակացրել է, որ ռուսական ուժերն այժմ «կենտրոնացած են Կիևի արևելյան, հյուսիս-արևմտյան և արևմտյան ծայրամասերում»՝ նախապատրաստվելով «հարձակման մայրաքաղաքի վրա՝ առաջիկա 24-96 ժամվա ընթացքում»։
Դրա հաջողությունը, ընդգծել է վերլուծական կենտրոնը, մասամբ կախված կլինի նրանից, թե որքան արդյունավետ կերպով ռուսական զորքերը կկարողանան «վերալիցքավորվել, վերակազմավորվել և պլանավորվել» նախնական ներխուժումից հետո, որը, փորձագետների կարծիքով, ձախողվել է որոշ թերությունների պատճառով:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
