ՏԵՍԱՆՅՈՒԹ. Հայաստանյան որոշ խանութներում հսկայական հերթեր են. մարդիկ խուճապահար գնումներ են կատարում
Արդեն մի քանի օր է, ինչ հայաստանյան որոշ խանութներում հսկայական հերթեր են գոյանում. մարդիկ խուճապահար վիճակով խանութներից գնումներ են կատարում: Հաճախորդները հիմնականում ձեթ, ալյուր, շաքարավազ են գնում: Որոշ խանութներում ապրանքները գրեթե ամբողջովին սպառվել են: Տպավորություն է, որ Հայաստանի կառավարությունը, մասնավորապես էկոնմիկայի նախարար Վահան Քերոբյանը տեղյակ չէ, թե ինչ է կատարվում երկրի ներսում: Նույնը կարող ենք ասել նաեւ Մրցակցության պաշտպանության հանձնաժողովի մասին: Այնուամենայնիվ, արձանագրենք, որ ՀՀ կառավարությունից դեռ որեւէ մեկը կոչով հանդես չի եկել՝ բացատրելու, թե ստեղծված իրավիճակում արդյոք պետք է մեծ քանակությամբ պարենային որոշ մթերքներ գնել: Ճիշտ է, առևտրի խոշոր ցանցերում սննդամթերքի գների թանկացում դեռեւս տեղի չի ունեցել վերջին օրերին: Բայց չի բացառվում, որ տնտեսվարողներն առիթից օգտվեն եւ բարձրացնեն ապրանքատեսակների գները: Քանի որ այս օրերին խուճապի մատնված քաղաքացիները շտապում են խանութներ եւ մեծ ծավալների գնումներ անում:Միայն ՀՀ բարձր տեխնոլոգիական արդյունաբերության նախարար Վահագն Խաչատուրյանն է խոսել՝ պատասխանելով հարցին՝ հացի խնդիր առաջանալու դեպքում ինչպիսի՞ քայլեր է ձեռնարկելու կառավարությունը. «Համոզված եղեք՝ այդ խնդիրը չի լինի, մենք գնահատում ենք մեր հնարավորությունները։ Մենք շատ լավ գիտենք, որ հացահատիկի արտադրության մեր ներքին ռեսուրսները կամ հնարավորությունները պակասել են, բայց այլ ձևերով այդ պակասը կլրացվի»։
Արդյոք որևէ ապրանքի գծով այս պահին ունենք անհանգստացնող երևույթ, հայտնի չէ: Բայց նշենք, որ երեկ հայտնի դարձավ, որ Ռուսաստանը ժամանակավորապես արգելում է հացահատիկային մշակաբույսերի արտահանումը ԵԱՏՄ երկրներ, այդ թվում՝ Հայաստան։ Ըստ պաշտոնական հաղորդագրության, սահմանափակումը տարածվում է ցորենի, տարեկանի, գարու, եգիպտացորենի վրա։ Այն ուժի մեջ կլինի մինչև օգոստոսի 31-ը։
Արդյոք Հայաստանի կառավարությունը քննարկում է որոշ ապրանքների գծով պարենային անվտանգության հարցը։ Հաշվի առնելով ռուս-ուկրաինական հակամարտությունը, Արևմուտքի կողմից Ռուսաստանի նկատմամբ տնտեսական պատժամիջոցների խստացումը, կարող ենք արձանագրել, որ Հայաստանը պետք է անհանգստանա պարենային անվտանգության հարցով։ Խոսքը այն ապրանքների մասին է, որոնք ներկրվում են Ռուսաստանից. ցորեն, ձեթ, շաքարավազ եւ այլն:
