Զոռով բերանս մի բացեք...Երասխում լարվածություն չի եղել, դիպուկահարներն են խփել` էդա
Ռուսները ադրբեջանցիների հետ աշխատանքներ են իրականացնում շատ օպերատիվ կերպով, որպեսզի թույլ տան իրենց հատվածից այդ խնդիրը կարգավորվի: Այս մասին «Իրավունք»-ի հետ զրույցում ասել է ԱԺ «Իմ քայլը» խմբակցության պատգամավոր Գագիկ Մելքոնյանը:Հարցին՝ իսկ հայկական իշխանությունները այս ուղղությամբ ի՞նչ են անում, Մելքոնյանը պատասխանել է. «Դե գիտեք, ռուս խաղաղապահներն են հիմա այդ հարցով զբաղվում, մենք էլ մեզնից կախված ամեն ինչ անում ենք: Մեր կապը հիմա ռուս խաղաղապահների հետ է, իրենք են աշխատում ադրբեջանական կողմի հետ: Մենք ուղիղ չենք կարող գնալ, հո, ադրբեջանցիների հետ խոսենք, ամեն ինչ կարգ ունի»:
Դիտարկմանը, որ ադրբեջանցիները թույլ չեն տալիս որևէ գյուղատնտեսական աշխատանք իրականացնել արցախցիներին, գրեթե ողջ շփման գծում նրանց կողմից միակողմանի հրետակոծություններ են, Մելքոնյանը արձագանքել է. «Դե ինչ վերաբերում է սահմանային իրադարձությունների սրմանը, ապա ես միշտ էլ ասել եմ, որ իրենք առիթից օգտվելու են, որպեսզի վախի մթնոլորտ ստեղծեն Արցախում, որպեսզի ժողովուրդը թողի դուրս գա: Էսա իրանց հիմնական նպատակը»,- ասել է Մելքոնյանը և հարցին՝ իսկ մենք ի՞նչ ենք անում այդ նպատակը, այսպես ասած, չեղարկելու համար, նա նշել է. «Մենք ինչ պետք է անում ենք, մեր զորքը ռուսների հետ համատեղ կանգնած է, պոստերը դրած են: Պիտի դիմակայենք: Նենց չի, որ նորություն էր սա, երեսուն տարի հա էլ սպառնացել են, խփել են, թշնամին մնում է թշնամին: Բայց վախենալու բան չկա, մեծ պատերազմ չի լինելու»:
Հարցին՝ այդ դեպքում ինչպե՞ս ենք թշնամու հետ խաղաղության մասին խոսում, երբ ամենօրյա ռեժիմով հակառակն ենք տեսնում, պատգամավորը նշել է. «Դե իրանք իրանց ծրագիրն ունեն, մենք` մերը: Մենք խաղաղության ենք գնում, իրենք էլ ցույց են տալիս, որ խաղաղության են գնում` տակից սադրանքներով: Ի վերջո արցախցի ժողովուրդը պետք ա հասկանա, որ սադրանք է, մնա իր տեղերում, ոչ մի մետր քայլ այն կողմ չգնա: Որովհետեւ նորից եմ ասում ոչ լայնածավալ պատերազմ չի լինելու: Ժողովուրդը պետք է կանգնի այնտեղ, որ մենք էլ կարողանք սահմանները պահել»:
Իսկ արդյոք հեշտ է ուղիղ սպառնալիքի, գնդակոծության ներքո մնալ այնտեղ, Մելքոնյանը պատասխանել է. «Զոռով բերանս մի բացեք էլի, իրանց գործն է՝ կմնան, չեն մնա, իրանց խնդիրն է»:
Դիտարկմանը՝ այսինքն արցախցիների անվտանգությունը ռուս խաղաղապահների՞ն է հանձնվել, Մելքոնյանը պատասխանել է. «Ով ա նման բան ասում, մենք հիմա կանգնենք ասենք, թե ինչեր ենք անում արցախցիների համար: Մեզ չի սազում, դա մեր պարտքն է: Մենք ընդդիմադիրների նման չենք, ովքեր երկիրը ուզում են քանդեն: Թուրքը էդքան վնաս չի տալիս, ինչքան իրանք են տալիս»:
Անդրադառնալով ՀՀ սահմաններին տիրող լարվածությանը՝ Մելքոնյանը նշել է. «Երասխում լարվածություն չի եղել, դիպուկահարներն են խփել` էդա: Լարվածություն չի եղել, ուղղակի դիպուկահարները տեսել են առանց կասկա, առանց բրոնյա, խփել են: Էդ դեպքը առաջնագծում չի եղել, եղել է թիկունքային մասում»:
