Վրաստանի օդային տարածքը փակ է ռուսական ռազմական ինքնաթիռների համար
Վրաստանի էկոնոմիկայի և կայուն զարգացման նախարարությունը հերքել է տեղեկությունն այն մասին, որ Ռուսաստանի ռազմաօդային ուժերի ինքնաթիռն իբր հատել է Վրաստանի օդային տարածքը։ Նախարարությունը հայտնել է, որ 2008 թվականից Վրաստանի օդային տարածքը փակ է ռուսական ռազմական ինքնաթիռների համար, Վրաստանի տարածքով թռել է Ռուսաստանի ԱԻՆ-ի ինքնաթիռը, որը ռազմական կարգավիճակ չունի, գրում է «Նովոստի-Գրուզիա» գործակալությունը։ «Հստակեցնելու համար. Ռուսաստանի ռազմաօդային ուժերի ինքնաթիռները չեն հատել Վրաստանի օդային տարածքը. վրացական երկինքը հատել է ՌԴ ԱԻՆ-ի RA76429 գրանցման համարանիշով «Իլ-76» ինքնաթիռը։ Այս չվերթը սովորական քաղաքացիական չվերթ էր, որը Վրաստանից լրացուցիչ թույլտվություն չի պահանջում. չվերթն իրականացնելու համար ավիաընկերությունը լրացնում է միայն էլեկտրոնային թռիչքի պլանը և մեկնում է Բրյուսել՝ EUROCONTROL-ի շտաբի օդային հոսքի կառավարման կենտրոն, որտեղ թռիչքի պլանը գրանցված է ընդհանուր էլեկտրոնային բազայում։
Արտակարգ իրավիճակների նախարարության ինքնաթիռները, որոնք չունեն ռազմական կարգավիճակ, կարող են հատել Վրաստանի օդային տարածքը»,- ասված է նախարարության հաղորդագրության մեջ։
