Ռուս զինվորների նկատմամբ ատելությունից բացի ոչինչ չեմ զգացել, այդ վայրագությունները փակում են ՌԴ-ի հետ բանակցությունների հնարավորությունը
Նախագահ Վլադիմիր Զելենսկին համոզված է, որ Մարիուպոլում և Կիևի շրջանի բնակավայրերում ռուսական զինված ուժերի սարսափելի հանցագործություններից հետո Ռուսաստանի հետ խաղաղ բանակցություններ վարելու հնարավորությունները գնալով նվազում են։ Այս մասին հայտնում է Украинская правда-ն:«Երկխոսությունը տարբերակներից մեկն է: Բայց Բուչայում կատարվածը փակում է երկխոսության հնարավորությունը։ Բուչա, Բորոդյանկա, Մարիուպոլ, սրանք փակում են երկխոսության հնարավորությունը և խնդիրը ամենևին էլ ես չեմ։ Այստեղ խոսքը Ռուսաստանի մասին է։ Նրանք մեզ հետ խոսելու շատ հնարավորություն չունեն»,- ասել է Զելենսկին։
Վերջինս նշել է, որ զգացել է մարդկային զգացմունքների ողջ շրջանակը, երբ իր աչքերով այցելել է Բուչայում ռուսական զինված ուժերի կողմից իրականացված ռազմական հանցագործությունների վայրերը:
Նա հավելել է, որ այդ օրվա վերջում ռուս զինվորների նկատմամբ ատելությունից բացի ոչինչ չի զգացել։ Նախագահը իր հարցազրույցներից մեկում, Ռուսաստանի ողջ քաղաքական և ռազմական ղեկավարությանը անվանել է ռազմական հանցագործներ:
Զելենսկին բացատրել է, որ ռուսները Մարիուպոլում սպանել և խոշտանգել են տասնյակ հազարավոր մարդկանց։ Բացի այդ, մեծ թվով մարդիկ բռնի ուժով տեղափոխվել են Ռուսաստան և զրկվել Ուկրաինայի քաղաքացիությունից։
Նշենք, որ Միջազգային քրեական դատարանի դատախազ Քարիմ Խանը ապրիլի 13-ին ասել էր, որ դատարանի քննիչները բոլոր հիմքերն ունեն ենթադրելու, որ Ուկրաինայում իրականացվել են ռազմական հանցագործություններ, որոնք պատժվում են ամենաբարձր մակարդակով՝ միջազգային հանրության կողմից:
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
