Ռուսները որոշել են այլևս չհանդուրժել ՀՀ իշխանությունների հակառուսական քաղաքականությունը.«Հրապարակ»
«Հրապարակ» թերթը գրում է.«Իշխանության քիչ թե շատ սթափ շրջանակներում կարծում են, թե ՀՀ-ում ՌԴ խորհրդական-դեսպանորդ Մաքսիմ Սելեզնյովի հայտարարությունը ՀՀ իշխանություններին ուղղված հերթական ապտակն է, որը հաջորդեց Հայաստանում ՌԴ դեսպանատան կողմից ԱԳՆ-ին ուղղված բողոքի նոտային։
Դեսպանորդը հայտարարել է, որ ռուս խաղաղապահները ոչ մի սանտիմետր չեն տեղաշարժվի Լաչինի գործող միջանցքից, քանի դեռ նոր ճանապարհը չի շահագործվել։ Բարձրաստիճան դիվանագետը շեշտել է՝ այս կապակցությամբ պայմանավորվածություններ կան՝ վկայակոչելով 2020 թվականի նոյեմբերի 9-ի եռակողմ հայտարարությունը, որում անորոշ ձևակերպումներ են, և չկա հստակ ժամկետ, թե նոր միջանցքը երբ պետք է շահագործվի, առավել ևս՝ հարակից բնակավայրերի բնակիչները պիտի տարհանվե՞ն, թե՞ ոչ։
Եռակողմ հայտարարությունը սահմանում է ընդամենը, որ «երեք տարվա ընթացքում Լաչինի միջանցքի երկայնքով նոր երթուղու կառուցման նախագիծ պիտի հաստատվի»։ Ստացվում է, որ ռուսները հայտարարում են, թե չկա Աղավնոն, Բերձորն Ադրբեջանին հանձնելու պայմանավորվածություն, ՀՀ իշխանությունները կատարում են Ալիևի բանավոր պահանջները` դեռ ամսվա սկզբին Աղավնոյի, Բերձորի բնակիչներին հորդորելով մինչև 25-ը հեռանալ իրենց բնակավայրերից։
Նշենք, որ նախօրեին էլ ՌԴ դեսպանատունը բողոքի նոտա էր հղել «Սուրմալու»-ի ողբերգության մեջ ռուսական կառույցներին մեղադրելու տրամադրությունների վերաբերյալ: Դիվանագետների կարծիքով, դա էլ էր ընդամենը պատրվակ, և ռուսները որոշել են այլևս չհանդուրժել ՀՀ իշխանությունների հակառուսական քաղաքականությունը, որոնք չորս տարի շարունակ Հայաստանում հակառուսական տրամադրություններ են գեներացնում»։
Մանրամասները թերթի այսօրվա համարում
