Աշխարհում բոլորը գիտեն, թե ինչպես է Կրեմլը օգտագործում պատերազմի դադարը՝ թող ձեր զինվորները վերցնեն զուգարանակոնքերը եւ հեռանան
Ուկրաինայի նախագահ Վլադիմիր Զելենսկին կոչ է արել ռուսներին՝ թող ձեր զինվորները վերցնեն զուգարանակոնքերը (ակնարկում է այն, որ ռուս զինվորները, որոնք կյանքում զուգարանակոնք չէին տեսել եւ չգիտեին դա ինչ է, ուկրաինական քաղաքների թալանի ժամանակ իրենց հետ տանում էին նաեւ դրանք․ խմբ) և հեռանան Ուկրաինայի 1991 թվականի սահմաններից այն կողմ։«Մի բան, որն այսօր ուզում եմ հիշեցնել Ռուսաստանի քաղաքացիներին. նոյեմբերի 15-ին ներկայացվեց խաղաղության ուկրաինական բանաձեւը, որի կետերից մեկը նախատեսում է ռուսական օկուպացիոն զորքերի դուրսբերումը մեր երկրի տարածքից: Սա կրակը, մարդկային կորուստները և ընդհանրապես պատերազմը դադարեցնելու հուսալի միջոց է», ասել է նախագահը ավանդական տեսաուղերձում։ Նա հավելել է, որ այդ օրվա առավոտվա դրությամբ սպանված ռուս զինվորների թիվը կազմում էր 82 հազար։
«Դեկտեմբերի 12-ին Ռուսաստանը առաջարկ է ստացել Խաղաղության բանաձևի իրականացումը սկսել օկուպացիոն զորքերի դուրսբերմամբ հենց Սուրբ Ծննդյան օրը: Այդ օրվա դրությամբ սպանված ռուս զինվորների թիվը գրեթե 95 հազար էր: Ըստ երևույթին, ձեր երկրի առաջնորդները մեր երկու առաջարկներ չլսեցին… Այնտեղ, որտեղ նրանք են, ըստ երևույթին, խորն է և անլսելի»,- ասել է Զելենսկին։
Նա ասել է, որ այսօրվա դրությամբ Ռուսաստանն արդեն կորցրել է 110 հազար սպանված զինվորական։
«Նրանք, ովքեր շարունակեցին տեռորը մեր երկրի դեմ և ձեր բոլոր մարդկանց սպանդի ուղարկեցին՝ մերժելով ռուսական ագրեսիան կասեցնելու մեր առաջարկները, հաստատ կյանքը չեն գնահատում և առավել եւս խաղաղության չեն ձգտում։ Հիմա ուզում են օգտագործել Սուրբ Ծնունդը։ Որպես քող, որպեսզի գոնե մի որոշ ժամանակով դադարեցնեն մեր տղաների առաջխաղացումը Դոնբասում և մեր դիրքերին մոտեցնեն տեխնիկա, զինամթերք և մոբիլիզացված մարդկանց։ Ի՞նչ կտա դա։ Միայն կորուստների թվի ևս մեկ ավելացում»։ Նախագահը նաև ասել է, որ աշխարհում բոլորը գիտեն, թե ինչպես է Կրեմլը օգտագործում պատերազմի դադարը՝ նոր թափով շարունակելու պատերազմը։
Նա հայտարարել է, որ պատերազմն ավելի արագ ավարտելու համար բոլորովին այլ բան է պետք. «Անհրաժեշտ է, որ Ռուսաստանի քաղաքացիներն իրենց մեջ քաջություն գտնեն առնվազն 36 ժամ, գոնե Սուրբ Ծննդյան օրերին, ազատվելու Կրեմլում մեկ անձի հանդեպ իրենց ամոթալի վախից: Նրա հանդեպ ձեր վախը կործանում է ձեր երկիրը, որը նույնպես արդեն խորը … մեջ է, բայց ոչ բունկերում: Պատերազմին վերջ տալը նշանակում է վերջ տալ ձեր պետության ագրեսիային: Նույնիսկ երբ ձեր հրթիռներն ու անօդաչուները չեն խոցում մեր քաղաքները, օկուպացված տարածքներում տեռորը շարունակվում է: Մարդկանց խոշտանգում են, հոսանքահարում, բռնաբարում: Դա շարունակվում է ամեն օր, քանի դեռ ձեր զինվորները մեր հողում են»,- ասել է Զելենսկին։
Նա հավելել է, որ պատերազմը կավարտվի, երբ ռուս զինվորները կամ հեռանան, կամ ուկրաինացիները վռնդեն նրանց։ «Ուրեմն թող վերցնեն զուգարանակոնքերը, ճանապարհին իրենց պետք կգան, հեռանան մեր սահմանից այն կողմ», ասել է նախագահը։
