Երկու հարց, որ ինձ մոտ տարակուսանք հարուցեցին․ինչպե՞ս է հնարավոր, որ ադրբեջանական դիրքերից ընդամենը 3 կմ հեռավորության վրա զորամասը սովորական անպաշտպան շինություն լինի
Սարսափելի ողբերգություն՝ Ադրբեջանի հետ սահմանին գտնվող Գեղարքունիքի մարզի Ազատ գյուղի զորամասում՝ 17 զոհված հայ զինվորներով. երկու հարց, որոնք անմիջապես ինձ մոտ տարակուսանք հարուցեցին։Այդ մասին ֆեյսբուքյան իր էջում գրել է իսրայելցի բլոգեր Ալեքսանդր Լապշինը։ Նա հրապարակել է Ազատի քարտեզը, որի վրա նշված է զոհված սակրավորների կացարան հանդիսացող վառված տունը։
1. Նայեցի Google-ի քարտեզը, գտա Ազատ գյուղը։ Գյուղն ակնհայտորեն լքված է, դատելով նկարից (ես ինքս այնտեղ երբեք չեմ եղել), և միակ բնակելի շենքերը աջ կողմում են՝ թարմ տանիքներով և սարքավորումների համար ավտոտնակներ հիշեցնող շենքերով։ Սա, հավանաբար, նույն զորամասն է, որտեղ զոհվել են զինվորները։ Եթե ես սխալվում եմ, և խոսքը այլ զորամասի մասին է, ապա ուղղեք ինձ։ Այսպիսով, հարց է առաջանում՝ ինչպե՞ս է հնարավոր, որ ադրբեջանական դիրքերից ընդամենը 3 (երեք) կիլոմետր հեռավորության վրա զորամասը սովորական անպաշտպան շինություն լինի։ Հարյուր անգամ բոլորը գրել ու խոսել են (այդ թվում՝ ես) պաշտպանված բունկերների և պաշտպանական գծերի կառուցման կարևորության մասին՝ անիմաստ է։ Տարածքը գնդակոծվում է ոչ միայն սովորական ականանետներից, այլև նույնիսկ դիպուկահարների կողմից՝ 2022 թվականի սեպտեմբերին ադրբեջանցիների կողմից գրաված գերիշխող բարձունքներից։ Սահմանին նոր բախումների դեպքում այս բոլոր զինվորները կդառնան մահապարտներ։ Ադրբեջանցիները երկու րոպեում հրետանիով կծածկեին այս զորանոցը։
2. Բայց այս դեպքում զինվորները զոհվել են նույնիսկ առանց հակառակորդի մասնակցության, նրանք ուղղակի ողջ-ողջ այրվել են զորանոցում։ Ինչպե՞ս է հնարավոր նույնիսկ, որ 17 երիտասարդ ու էներգիայով լի տղաներ չկարողանան դուրս գալ 2-3 հարկանի փոքրիկ շենքից։ Եթե անգամ պատուհաններից դուրս թռնեին, երկրորդ հարկից ցած նետվելը մահացու չէր լինի։ Ստացվում է, որ զորանոցի պատուհաններն ու դռներն են արգելափակվել. Ես ճի՞շտ եմ հասկանում, որ հայկական զորանոցի պատուհանները ճաղավանդակներով են փակվում, իսկ երկաթե դռները գիշերը փակում են, որ զինվորները չկարողանան դուրս գալ։ Եթե այո, ապա սա հակահրդեհային անվտանգության կանոնների կոպիտ խախտում է, էլ չեմ խոսում այն մասին, որ հանկարծակի գնդակոծության դեպքում զինվորները պետք է կարողանան դուրս վազել շենքից։
Խոսքեր չկան։ Եթե այս ողբերգության պատասխանատու հրամանատարները տասը տարի չհայտնվեն «պատուհաններին ճաղավանդակներով փակ սենյակում» (կարող եմ խորհուրդ տալ Նուբարաշենի բանտը), ապա ավելի տրամաբանական կլինի փակել Հայաստանի Հանրապետության նախագիծը։
P.S. ֆեյսբուքում արդեն հայտնվել են այլասերվածների մեկնաբանությունները (կներեք կոպտության համար), որ մեղավոր են ռուսները, ֆրանսիացիները, որոշ առասպելական սադրիչներ ու դիվերսանտներ։ Սկսվում է հայկական սովորական սխեման՝ «Շրջապատում բոլորն են մեղավոր, բացի իրենցից»։ Սրանք օտարներ են, պարզվում է՝ հայկական զորանոցներ են սարքում առանց թշնամուց պաշտպանվելու, օտարներն են, որ պատուհաններին ճաղավանդակներ են ամրացրել, որ զինվորները չկարողանան փախչել։ Ոչ, պաշտպանական ամրությունների կառուցման բյուջեն գողանում են ոչ թե սեփական գեներալները, այլ մեղավոր են ֆրանսիացիները, ռուսները, հրեաները։ Դե, ինչպես միշտ:
Շատ հեշտ է ընկեր դառնալ այս բազմոցային հեծելազորի համար, որը չի հանդուրժում քննադատությունը, գլուխ գովել հայկական ջրի որակի մասին՝ «второй мэсто в мыре», վերջ, դու նրանց ընկերն ու եղբայրն ես։ Ադրբեջանում, ի դեպ, մտածելակերպը լրիվ նույնն է, այնտեղ, գովասանքի համար, ուղղակի լիզում են բոլոր տեղերը (այդ թվում՝ դժվարամատչելիները) ու խավիարով լցնում, գրել է հայտնի բլոգերը։
