Ամեն վիրակապությունից հետո ցավազրկում, քնեցնում ենք. Բաբայանը՝ հրդեհից տուժած զինծառայողների վիճակի մասին
Գեղարքունիքի մարզի Ազատ գյուղում տեղակայված ինժեներասակրավորային վաշտի կացարանում բռնկված հրդեհի հետևանքով այրվածքներ ստացած երեք զինծառայողների առողջական վիճակում մեծ փոփոխություններ չկան, բայց փոքր դրական դինամիկա կա: Տեղեկությունը «Փաստինֆո»-ի հետ զրույցում հայտնեց Այրվածքաբանության և մաշկաբանության ազգային կենտրոնի փոխտնօրեն Կարինե Բաբայանը:«Երկու զինծառայողները դեռ վերակենդանացման բաժանմունքում են գտնվում, շատ մեծ փոփոխություններ չկան, բայց փոքր դրական դինամիկա կա: Ամեն վիրակապությունից հետո իրենց ցավազրկում, քնեցնում ենք, քնի ժամանակ չեն շփվում, այնուհետև ադեկվատ են»,- ասաց Բաբայանը:
Նրա խոսքով՝ զինծառայողները, երբ արթուն են, կարողանում են բուժանձնակազմի և ծնողների հետ հաղորդակցվել: Տեսակցությունները, ինչպես բոլոր հիվանդների դեպքում, որոշակի ժամերի են նախատեսված:
«Վերակենդանացման բաժանմունքում բացի իրենցից ևս երկու ծանր հիվանդներ կան, ժամ կա, որ ծնողները գան, տեսնեն իրենց երեխաներին: Շաբաթվա վերջում պարզ կլինի՝ տղաներին կտեղափոխենք հիվանդասենյակ, թե ոչ: Այս դինամիկայով գուցե և լավ լինի»,- հավելեց կենտրոնի փոխտնօրենը:
Հիշեցնենք, որ հունվարի 19-ին՝ ժամը 01:30-ի սահմաններում, դեռևս չպարզված հանգամանքներում` Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 զինծառայող, եւս 3 հոգի տարբեր աստիճանի այրվածքներով տեղափոխվել հիվանդանոց, նրանց վիճակը գնահատվում է ծանր։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։
Հունվարի 20-ին կառավարության նիստին Նիկոլ Փաշինյանի կողմից շրջանառության մեջ է դրվել ավտոբենզինի միջոցով վառարանը միացնելու հետեւանքով հրդեհի բռնկման վարկածը, ինչը հետագայում արտացոլվել է նաև ՔԿ տարածած հաղորդագրությամբ։
Դասակի հրամանատարը, սակայն, թյուրիմաց է գնահատել նշված վարկածը՝ նշելով, որ հունվարի 18-ի երեկոյան ինքը կացարանում բենզին չի տեսել, մեկ այլ զինվորական հայտնել է, որ վառարանը միացնում են առավոտյան ու բացառել գիշերվա կեսին, երբ արդեն քնում են, առավել եւս բենզինով թեժացնելը։
.jpg)
