Սինխրոնացված վարքագիծ.Միայնակ ու անպաշտպան թողնել Արցախին գայլերի ոհմակի առաջ, նշանակում է՝ կրկնակի, եռակի դավաճանություն գործել
Այն ինչ արեց Ադրբեջանի հանցագործ նախագահը՝ Ալիևը, մյունխենյան համաժողովի ժամանակ, ոչ այլ ինչ էր, քան Նիկոլ Փաշինյանի և նրա իշխանության դավադիր և կապիտոիլիացիոն ելքը հայ ժողովրդի վզին փաթաթելու քայլ։ Այս մասին լրագրողների հետ ճեպազրույցում ասաց ԱԺ «Հայաստան» խմբակցության քարտուղար Արծվիկ Մինասյանը։Նրա խոսքով՝ Ալիևն ու Փաշինյանը գործում են համագործակցված. Հայաստանի գործող իշխանությունը փորձում է թե՛ հայ, թե՛ միջազգային հանրությանը ներկայացնել, որ հայ ժողովուրդը համակերպվել է այն դառը իրականության հետ, որ մենք կորցրել ենք Արցախը, կամ կորցրել ենք Հայաստանը կամ հայ ժողովրդին պաշտպանելու կարողությունը, Ալիևն էլ՝ աշխատում է Ադրբեջանում իր դիրքերն ամրապնդել։
«Մեկը՝ Հայաստանի ներսում իր իշխանությունը պահելուն ուղղված գործողություն է անում, մյուսը՝ Ալիևը, միջազգային հանրության և իր երկրի ներսում դիրքերն է ամրապնդում։ Սա իրար հետ սինխրոնացված վարքագիծ է, երկուսն էլ դեմ են հայ ժողովրդի ընդհանուր իրավունքներին, մեր ընդհանուր պատկերացումներին»,- նշեց Մինասյանը։
Նրա խոսքով՝ 2020 թվականի նոյեմբերի 9-ին ստորագրած «խայտառակությունն» արդեն իսկ Արցախի տարածքները Ադրբեջանին հանձնելու ոչ իրավաչափ, հանցագործ վարքագիծ էր Նիկոլ Փաշինյանի կողմից և հիմա, երբ Փաշինյանն ասում է, որ Արցախը պետք է խոսի Ադրբեջանի հետ, հարց է ծագում՝ ով էր Փաշինյանը, երբ ստորագրում էր Արցախի կապիտուլյացիան։
«Ո՞վ է Նիկոլ Փաշինյանը, որ պետք է ստորագրի Արցախի տարածքները Ադրբեջանին հանձնելու մասին, ո՞վ է, ի՞նչ իրավասություն ունի։ Հիմա, երբ ինքը ձեռքերը լվանում է, ասում է՝ թող Արցախը խոսի, հարց է առաջանում՝ բա ո՞վ էիր, որ այն ժամանակ, որ ստորագրում էիր դա, ով էիր, որ երկու կարևորագույն կյանքի ճանապարհներից մեկը հանձնում էիր, մյուսն էլ՝ փոխանցում էիր այլ մեխանիզմով»,- հավելեց պատգամավորը։
Մինասյանի կարծիքով՝ այս իրավիճակում միայնակ ու անպաշտպան թողնել Արցախին գայլային ոհմակների առաջ և հիմնավորել, որ Արցախը կամ արցախահայերը պետք է որոշեն՝ ինչպես շարժվել առաջ, նշանակում է՝ կրկնակի, եռակի դավաճանություն գործել։
