1,7 միլիոնանոց հանրահավաքում Էրդողանը խոստացել է.Քվեատուփերում կթաղենք ընդդիմությանը՝ ԼԳԲՏ-ին աջակցելու համար. Իմ ժողովուրդը թույլ չի տա, որ հարբեցողները բեմ բարձրանան
Թուրքիայի նախագահ Ռեջեփ Էրդողանը Ստամբուլում հանրահավաքի ժամանակ մեղադրել է ընդդիմությանը ԼԳԲՏ համայնքին աջակցելու մեջ եւ խոստացել «թաղել քվեատուփերում» իր ընդդիմախոսներին, հաղորդում է Reuters-ը: ««Արդարություն եւ զարգացում» կուսակցությունը եւ մեր դաշինքի մյուս կուսակցությունները երբեք ԼԳԲՏ-ական չեն լինի, քանի որ ընտանիքը մեզ համար սուրբ է: Մենք քվեատուփերում թաղելու ենք նրանց, ովքեր հանդես են գալիս ԼԳԲՏ-ի օգտին»,-ասել է Էրդողանը։ Վերջին տարիներին Էրդողանը խստացրել է իր հռետորաբանությունը ԼԳԲՏ համայնքի նկատմամբ՝ հաճախ իր ներկայացուցիչներին անվանելով «դեվիանտներ»։ Հանրահավաքին, որին, ինչպես հայտարարել է ինքը՝ Էրդողանը, ներկա է եղել 1,7 միլիոն մարդ, նա քննադատել է նաեւ ընտրություններում իր գլխավոր մրցակից Քեմալ Քըլըչդարօղլուին։ «Իմ ժողովուրդը թույլ չի տա, որ հարբեցողները բեմ բարձրանան։ Պարոն Քեմալ, Դուք կարող եք խմել տակառներով, ոչինչ Ձեզ չի բուժի։ Իմ ժողովուրդն անհրաժեշտ պատասխանը կտա մայիսի 14-ին»,-ասել է Էրդողանը։Էրդողանը նաեւ մեղադրել է Քըլըչդարօղլուին նրանում, որ նա աջակցություն է ստանում արգելված Քրդստանի բանվորական կուսակցությունից, որը ապստամբ պայքար է մղում 1980-ականներից: Թուրքիան, ԱՄՆ-ն ու Եվրամիությունը ՔԲԿ-ն ահաբեկչական խմբավորում են համարում։ «Մայիսի 14-ին իմ ժողովուրդը կտա անհրաժեշտ պատասխանը։ Մենք թույլ չենք տա Քըլըչդարօղլուին, որն աջակցություն է ստանում ահաբեկիչներից, պառակտել մեր հայրենիքը»,-ասել է Էրդողանը։
Նախօրեին Էրդողանը հայտարարել է, որ առաջիկա համընդհանուր ընտրությունները կավարտվեն իր վերընտրությամբ եւ իշխող դաշինքի հաղթանակով: Նրա խոսքով՝ տվյալ արդյունքը շահեկան կլինի պետության բոլոր քաղաքացիների համար, նույնիսկ եթե նրանք աջակցում են ընդդիմությանը։ Հարցման տվյալներով՝ Էրդողանը կարող է հաղթել նախագահական ընտրությունների երկրորդ փուլում՝ իր հիմնական մրցակից Քըլըչդարօղլուից 3 տոկոս տարբերությամբ։
