Տեսանյութ.Ինչու Ռուսաստանը չի կարողանում ճնշել Բաքվին.ՌԴ-ում տարակուսանքով են ընդունել Ղարաբաղը որպես Ադրբեջան ճանաչելու Փաշինյանի ցանկությունը
«Մայիսի վերջին, երբ Հայաստանի ներկայիս վարչապետ Նիկոլ Փաշինյանը հայտարարեց, որ պատրաստ է ճանաչել Լեռնային Ղարաբաղը որպես Ադրբեջանի մաս, այս հարցի կարգավորումը հօգուտ Հայաստանի լուծելու կամ նրա շահերը հաշվի առնելու հավանականությունը կտրուկ նվազել է։ Դա իսկապես բեկումնային պահ էր․ Նիկոլ Փաշինյանի այս հայտարարությունը Ռուսաստանում տարակուսանքով են ընկալել, քանի որ 2020 թվականին ռուսական կողմի գործողությունների շնորհիվ էր, որ Լեռնային Ղարաբաղի տարածքների առնվազն կեսը մնաց հայկական վերահսկողության տակ»։Այս մասին Alpha News-ին տված հարցազրույցում ասել է Ազգային գիտահետազոտական համալսարանի Տնտեսագիտության բարձրագույն դպրոցի Համաշխարհային տնտեսության և միջազգային հարաբերությունների ֆակուլտետի Համապարփակ եվրոպական և միջազգային հետազոտությունների կենտրոնի փոխտնօրեն Դմիտրի Սուսլովը՝ պատասխանելով հարցին, թե ինչու Ռուսաստանը չի կարողանում ազդել իրավիճակի վրա, ճնշել Բաքվին, որպեսզի այն կատարի 2020 թվականի նոյեմբերի 9-ի եռակողմ հայտարարության պայմանները։
«Ռուսական տեսլականն այն էր, որ ղարաբաղյան հիմնախնդրի վերջնական կարգավորումը հիմնված կլինի սահմանազատման հարցի ուղղությամբ, որը ձևավորվել էր 2020 թվականի նոյեմբերին։ Այո՛, Շուշի քաղաքը անցավ Ադրբեջանին, բայց միևնույն ժամանակ Ստեփանակերտը մնաց Հայաստանի փաստացի վերահսկողության տակ, և Լեռնային Ղարաբաղի հայ բնակչությունը կշարունակեր ապրել հայկական պետության կազմում։ Բայց Փաշինյանի հայտարարությունը բացառեց վերը նշված կարգավորման ցանկացած հնարավորություն։ Եվ իհարկե, միանգամայն իրավացիորեն շեշտեցիք, որ Ադրբեջանը վերջին օրերին սկսել է էլ ավելի սրել իրավիճակը՝ արգելափակելով Լաչինի միջանցքը։ Հարց է առաջանում՝ ինչո՞ւ։ Քանի որ Փաշինյանը համապատասխան հայտարարություններ է արել։ Եվ քանի որ այն բանից հետո, երբ Հայաստանի վարչապետը հայտարարեց, որ Ղարաբաղը Ադրբեջանի մաս է, բնական է, որ այժմ Ադրբեջանը պահանջում է ամեն ինչ փոխանցել իրեն և փորձում է արագացնել համապատասխան գործընթացները։
Հիմա ես չեմ տեսնում իրավիճակը հետ խաղարկելու որևէ հնարավորություն և փորձելու ապահովել հայկական վերահսկողությունը։ Այո՛, Փաշինյանը հայտարարեց, որ Ղարաբաղը Ադրբեջանի կազմում ճանաչելու պայմանը Լեռնային Ղարաբաղի հայ բնակչության իրավունքների պաշտպանությունն ու երաշխավորումն է։ Սակայն մենք ձեզ հետ քաջ գիտակցում ենք, որ այս ամենը գրված է բառացիորեն «պատառաքաղով՝ ջրի վրա»։ Ադրբեջանն արդեն բարձրաձայն հայտարարում է, որ Լեռնային Ղարաբաղի բնակիչներին հատուկ իրավունքներ չի շնորհելու»,-ասել է Դմիտրի Սուսլովը։
