Տեսանյութ.Փաշինյանը պետք է 3 ամիս լռի ու չխոսի ոչինչ, այդ ընթացքում կարելի է կտրուկ փոխել իրավիճակը
Եթե այսօր ինձ ու մի խումբ դիվանագետների հնարավորություն տրվի, ապա 2-3 ամսվա ընթացքում կարելի է իրավիճակում կտրուկ փոփոխություն մտցնել։ «Հայաքվե»-ի ստորագրահավաքին միանալուց հետո այս մասին հայտարարեց ՀՀ նախկին արտգործնախարար Վարդան Օսկանյանը՝ հավելելով, որ դա հնարավոր է միայն այն դեպքում, երբ այդ լիազորությունները լինեն լիարժեք։«Փաշինյանն այդ երեք ամիսներին պետք է լռի, ուղղակի չխոսի։ Այնքան վնաս, ինչքան Հայաստանին ու հայ ժողովրդին տրվել են Փաշինյանի հայտարարությունները՝ նախկինում երբեք չի եղել։ Փաշինյանի խոսելը մեր գլխին պատերազմ է բերել։ Պատերազմից հետո նրա խոսելը տեղի ունեցածն ավելի է խորացրել։ Այսօր Փաշինյանի խոսել շարունակելն առավել բարդացնում է իրավիճակն ու այդ իրավիճակը փոխելու հնարավորությունները»,- հայտարարեց նա։
Ըստ նրա՝ պետք է փոխել բանակցությունների տրամաբանությունն ու նարատիվը։
Օսկանյանի խոսքով՝ միջազգային հանրությունը ցանկանում է ԼՂ հիմնահարցի հանգուցալուծումը, բայց նրան չի հետաքրքրում, թե ինչպես, նրանք գնում են այն ճանապարհով, որն իրենց առաջ բացվել է՝ հեշտ ճանապարհով:
«Այսօր Նիկոլ Փաշինյանը միջազգային հանրությանը ցույց է տալիս ամենահեշտ ճանապարհը՝ Ղարաբաղը Ադրբեջանին հանձնելու: Իհարկե, միջազգային հանրությունն ամեն ինչով կաջակցի Փաշինյանին, որպեսզի այդ հանգուցալուծումը լինի: Հավատացեք, այն պահին, երբ ՀՀ իշխանությունները նոր ձևակերպում կտան բանակցությունների բնույթին՝ միջազգային հանրության մոտ կտրուկ դիրքորոշման փոփոխություն կլինի»,-ասաց նա։
