Ծանր ու թեթև արեք, հետո նոր բերենք հայկական տիրույթ․․․Ադրբեջանը բոլոր ճակատներով ուզում է, որ իր խաղի կանոններով խաղանք.
Ադրբեջանից եկող ցանկացած ինֆորմացիա պետք է շատ երկար ծանր ու թեթև անեն փորձագետները, հետո նոր բերեն հայկական տիրույթ:Այս մասին «Ֆեյսբուք»-ի իր էջում գրել է ռազմական փորձագետ Կարեն Հովհաննիսյանը՝ անդրադառնալով ադրբեջանական հեռուստաալիքներից մեկով ցուցադրված եղանակի տեսության հոլովակին, որտեղ ՀՀ-ն ներկայացվել է որպես Արևմտյան Ադրբեջան։
«Ադրբեջանը բոլոր ճակատներով ուզում է, որ իր խաղի կանոններով խաղանք։ Համացանցում հայտնվել էին Բաքվի բռնապետի շահերը սպասարկող ադրբեջանական մի հեռուստաալիքի եղանակի տեսության հոլովակ, որտեղ ՀՀ-ն ներկայացվում է որպես Արևմտյան Ադրբեջան։
Բաքվի բռնապետի խորհրդատուները ( խորհրդականների հետ չշփոթել) առաջարկել են այս մեթոդով թելադրել սեփական խաղի կանոնները, որպեսզի մենք էլ տրվենք դրան ու մոռանանք ամենակարևոր թեմաները՝ կապված Արցախի շուրջ տեղի ունեցողի հետ։
Բաքվի բռնապետը փորձում է այս կերպ ազդել մեր առօրյա քննարկումների վրա, այսպես ասած, մեզ տալիս է օրվա, շաբաթվա սպառելու նյութ, որ մենք դրանով զբաղվենք ու երկրորդական, երրորդական պլան մղենք կարևոր հարցը։
Ադրբեջանից եկող ցանկացած ինֆորմացիա պետք է շատ երկար ծանր ու թեթև անենք մենք փորձագետներս, հետո նոր բերենք հայկական տիրույթ․․․ Ամեն բան չէ, որ կարելի է հանրությանը հրամցնել, դրանով մենք կարևոր հարցերից ենք շեղում և ակամայից դառնում խաղի կանոններով խաղացող»,- գրել է փորձագետը:
Հիշեցնենք՝ ՀՀ ԱԳՆ խոսնակ Անի Բադալյանն անդրադառնալով տեղի ունեցածին, «Թվիթերի իր էջում գրել էր․ «Բաքվի հեռուստատեսությունը Հայաստանը, ներառյալ մայրաքաղաք Երևանը, եղանակի տեսության ժամանակ ներկայացնում է որպես Ադրբեջան:
Հարևան երկրի ինքնիշխանության նկատմամբ տարածքային հավակնությունների ևս մեկ բացահայտ քարոզչություն։ Հիվանդ պատրանքները և թշնամական հռետորաբանությունը պետք է կտրականապես մերժվեն»։
