Չէի սպասում, որ այդքան անլուրջ կմերժեն.Ռուսական զորքերը չեն կարողանում գլուխ հանել, այլ կոնտինգենտներ են անհրաժեշտ
Արցախի նախագահին կից Հակաճգնաժամային խորհրդի ղեկավար Տիգրան Պետրոսյանը Step1.am-ի հետ զրույցում մեկնաբանեց ռուսական խաղաղապահ զորախմբի հրամանատարության պատասխանը «Միջանցքի ապաշրջափակման համար» ժողովրդական շարժման շտաբի նամակին.-Անկեղծ ասած, մենք այլ պատասխան էինք սպասում։ Մտքովս մերժման տարբեր տարբերակներ էին անցնում, բայց չէի սպասում, որ այդքան անլուրջ կմերժեն։ Սակայն սա շատ հարցերի պատասխան է տալիս, օրինակ՝ իրենք արդեն գիտեն, որ գնալու ենք Հաքարի կամուրջ, և հրաժարվում են ուղեկցել, պաշտպանել, քանի որ գիտեն, որ վտանգ կա։ Սա վկայում է այն մասին, որ նրանք Լաչինի միջանցքի նկատմամբ, ինչպես ասվում է, վերահսկողություն չունեն։
-Ձեր կարծիքով՝ նրանք չե՞ն ցանկանում կատարել իրենց պարտավորությունները, թե՞ չեն կարող։
-Կարծում եմ՝ չեն կարող։ Այո, մենք հասկանում ենք, որ նրանց նույնպես դուր չի գալիս, թե ինչպես է իրենց հետ վարվում Ադրբեջանը, բայց նրանք զինվորներ են և առանց վերևից հրահանգի ոչինչ անել չեն կարող։ Բայց, այնուամենայնիվ, դա չի փոխում պատկերը՝ Ռուսաստանի Դաշնության խաղաղապահ զորախումբը չի կատարում իր պարտավորությունները։
– Դուք և Ձեր թիմն էլ ասացիք, որ ժամանակն է մտածել միջազգային ուժերի ներկայության մասին, ճի՞շտ է։
-Իհարկե, փաստն այն է, որ ճանապարհը փակ է, եւ պատասխանառուները չեն ուզում կամ չեն կարողանում բացել։ Նման իրավիճակում, երբ ռուսական խաղաղապահ զորախումբը ոչինչ չի անում, մարդիկ նպատակահարմար են համարում ներգրավել նաև այլ խաղաղապահների։ Մենք նամակ էինք գրել՝ առաջարկելով ավելացնել ռուս խաղաղապահների կոնտինգենտը, եթե դա է խնդիրը, բայց ինչպես տեսնում ենք, ոչ մի միջոց չի ձեռնարկվում, իսկ մարդիկ անվտանգություն են ուզում։ Ռուսական զորքերը չեն կարողանում գլուխ հանել, և այլ կոնտինգենտներ են անհրաժեշտ։
-Հաջորդ հարցը վերաբերում է խորհրդարանի նախագահի ընտրությանը։ Ինչպե՞ս եք մեկնաբանում:
Ես հարգում եմ Դավիթ Իշխանյանին որպես մարդ, նա խորհրդարանում շատ բաներով գերազանցում է բոլորին, բայց տեղի ունեցածը մեծ հարված է մեր պետական համակարգին, հետընթաց է։ Որոշ միջազգային փորձագետներ դա մեկնաբանել են՝ պնդելով, որ դա ճիշտ քայլ չէ։ Աշխարհը նայում է մեզ՝ մեր պետական համակարգին, և այն, ինչ տեղի ունեցավ, անձամբ ինձ համար անընդունելի է։
