Տեսանյութ.Ստեփանակերտի ճանապարհին վթարի է ենթարկվել ադրբեջանական ավտոբուսը
Ադրբեջանի պրոֆեսիոնալ ֆուտբոլի լիգայի (ԱՊՖԼ) ղեկավարությանը տեղափոխող միկրոավտոբուսը օկուպացված Աղդամի մոտակայքում՝ դեպի Ստեփանակերտ ճանապարհին վթարի է ենթարկվել, ինչի հետևանքով 6 անձ է տուժել։ Տեղեկությունը հայտնում են ադրբեջանական ԶԼՄ-ները։
6 տուժածներից երկուսի վիճակը գնահատվում է ծանր: ԱՊՖԼ ղեկավար Էլխան Սամեդովը ունի մեծ բաց կոտրվածք՝ աջ սրունքի վերին երրորդի տեղաշարժով, ինչպես նաև աջ արմունկային հոդի ներհոդային կոտրվածք։ ԱՊՖԼ-ի փոխնախագահն ունի ողնաշարի սեղմման կոտրվածք:
Նշվում է, որ ԱՊՖԼ-ի ղեկավարությունն ուղևորվում էր Ստեփանակերտ, որտեղ դեկտեմբերի 21-ին պետք է տեղի ունենա Ադրբեջանի գավաթի 1/8 եզրափակիչի հանդիպումը:
Տեղեկություններ կան նաև, որ Ադրբեջանի պրոֆեսիոնալ ֆուտբոլային լիգայի նախագահ Էլխան Սամեդովը և փոխնախագահ Ասլան Շախգյալդիևը զոհվել են։