Առևանգո՞ւմ, թե.Արագածոտնում 10 ժամից ավել որոնվում էր Նիկոլ Փաշինյանին ասֆալտապատման վերաբերյալ հարց տված քաղաքացին
![Առևանգո՞ւմ, թե...Արագածոտնում 10 ժամից ավել որոնվում էր Նիկոլ Փաշինյանին հարց տված քաղաքացին Առևանգո՞ւմ, թե...Արագածոտնում 10 ժամից ավել որոնվում էր Նիկոլ Փաշինյանին հարց տված քաղաքացին](https://mediahub.am/uploads/images/2024/07/image_750x_6694e94dd4ced.jpg)
Ինչպես դեպքի վայրից հայտնում է ֆոտոլրագրող Գագիկ Շամշյանը, ՀՀ ՆԳՆ ոստիկանության Արագածոտնի մարզային վարչության ծառայողները՝ վարչության պետ Ալիկ Հակոբյանի, ոստիկանության Արագածի բաժնի քրեական հետախուզության և համայնքային ոստիկանության բաժանմունքների ծառայողները՝ բաժնի պետ Գևորգ Պալյանի, ՀՀ ՆԳՆ ոստիկանության Պարեկային ծառայության Արագածոտնի մարզի գումարտակի պարեկները՝ գումարտակի հրամանատար Մհեր Մեքլոնայնի գլխավորությամբ, Ծաղկահովիտ գյուղի բնակչության մեծ մասը, ինչպես նաև ՀՀ ՆԳՆ փրկարար ծառայության Արագածոտնի մարզային փրկարարական վարչության, Աշտարակի, Ապարանի և Արագածի փրկարարները կինոլոգների հետ 10 ժամից ավելի որոնողական աշխատանքներ են կատարել՝ Արտակ Ն.-ին հայտնաբերելու ուղղությամբ:
Գեղաձոր-Հնաբերդ ճանապարհահատվածում հայտնաբերվել է նրան պատկանող «Kia» մակնիշի ավտոմեքենան՝ ճամփեզրին կայանված, դռները բաց վիճակում:
Ավտոմեքենայի մեջ հայտնաբերվել են անձնական իրերը:
Գ. Շամշյանի տեղեկություններով՝ ավտոմեքենան հայտնաբերել են նրա հարազատները և տեղեկությունը փոխանցել ոստիկանության Արագածի բաժին:
Տեղում տարածքը սահմանազատել են ՊԾ Արագոծտնի մարզի գումարտակի պարեկները:
Ժամեր շարունակ որոնողական աշխատանքների՝ արդյունք չտալու պատճառով դեպքի մասին ոստիկանության Արագածի բաժնից տեղեկությունը փոխանցել են ՀՀ քննչական կոմիտեի Արագածոտնի մարզային քննչական վարչություն, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ:
Արդեն գիշերը՝ ժամը 21:30-ի սահմաններում, նրան Ծաղկահովիտ բնակավայրի սկզբնամասում իր ազգականը հայտնաբերում է, որից հետո նրանք ներկայանում են ոստիկանության Արագածի բաժին:
Ֆոտոլրագրողի հետ զրուցում նրա հարազատներն ասում էին, որ նրա նկատմամբ հավանաբար հաշվեհարդար են տեսել, քանի որ երբ 1 օր առաջ ՀՀ վարչապետ Նիկոլ Փաշինյանը այցելել է Արագածոտնի մարզ, Լեռնապար գյուղում ինքը վարչապետին դժգոհել է ճանապարհների ոչ որակյալ ասֆալտապատման համար, հայտնել է, որ ավարտին չի հասցվում Ծաղկահովիտ գյուղի հիվանդանոցի վերանորոգման աշխատանքները, ու հարազատները ասում էին, որ դա է եղել պատճառը, որ նրան առևանգել են:
Դեպքի փաստով Արագածոտնի մարզային քննչական վարչությունում նախաձեռնվել է քրեական վարույթ:
Ֆոտոլրագրողի տեղեկություններով՝ Արտակ Ն.-ն Ծաղկահովիտ համայնքի սոցիալական աջակցության հարցերով բաժնի պետն է, ով Ծաղկահովիտում ունի նաև ատամնաբուժարան:
Իրավապահներն էլ ունեն կասկածներ, որ ոչ մի առևանգում տեղի չի ունեցել և նրա անհետանալը կապ չունի նրա հարազատների կողմից բարձրաձայնված այն խնդիրների հետ, որ եթե նա վարչապետին ոչ հաճելի հարցեր չտար, ապա նրա հետ այս դեպքը տեղի չէր ունենա:
Հարազատերը նշում էին նաև, որ իրենք ՀՀ վարչապետից ու Կառավարությունից ոչ մի դժգոհելու առիթ չեն ունեցել, միշտ աջակցել են Կառավարության ծրագրերին ու վարչապետը ոչ մի կապ չունի այդ դեպքի հետ, այլ ասում էին, որ հնարավոր է՝ ասֆալտապատում կատարող ընկերության մատն է խառը: