Հայ Առաքելական Եկեղեցին նշում է Բուն բարեկենդանը, որից հետո սկսվում է Մեծ Պահոց շրջանը՝ ինքնամաքրման, զղջումի և աղոթական կյանքի
Բուն Բարեկենդանը Մեծ պահքի առաջին կիրակին է, որին հաջորդում է Մեծ Պահքը: Այդ օրը պատարագը տեղի է ունենենում փակ վարագույրի ետևում։
Բուն բարեկենդանի նախորդ շաբաթ օրը, երեկոյան ժամերգության ընթացքում փակվում են բոլոր եկեղեցիների խորանների վարագույրները, որոնք բացվում են Սբ. Զատիկի ճրագալույցի Պատարագին:
Մեծ պահքի ընթացքում վարագույրը բացվում է միայն Ծաղկազարդին, Ավագ հինգշաբթի՝ ոտնլվայի արարողությանը, Սբ. Գրիգոր Լուսավորչի մուտքը վիրապ, Սբ. Մարիամ Աստվածածնի ավետման, Տեառընդառաջի տոներին, եթե դրանք հանդիպում են Մեծ պահքի օրերին:
Բուն Բարեկենդանը հիշեցնում է մեր նախածնողների՝ Ադամի և Եվայի դրախտային, երանելի, երջանիկ կյանքը, Տիրոջ ներկայությունը վայելելը: Ուրախ սրտով նշելով Բուն Բարեկենդանը՝ մտնում ենք Մեծ Պահոց շրջան՝ ինքնամաքրման, զղջումի, աղոթական կյանքի մի շրջան: Այս ընթացքը մեզ հնարավորություն է տալիս խորհելու, ինքնամաքրվելու և զղջումի, աղոթքի միջոցով դառնալու դեպի Աստված, դեպի դրախտային վիճակ:
Ժամանակին Բուն Բարեկենդանին բնորոշ էին մեծ տոնախմբությունները: Գլխավոր զվարճությունը դիմակավոր խաղերն ու թատերական ժողովրդական ներկայացումներն էին:
