Աղին բնակավայրում տեղի ունեցած վթարի հետևանքով տուժած երեխաների վիճակը շարունակում է մնալ ծանր և ծայրահեղ ծանր
Շիրակի Աղին բնակավայրի մոտակայքում տեղի ունեցած վթարի հետևանքով տուժած անձանց վիճակը շարունակում է մնալ ծանր. բժիշկները պայքարում են նրանց կյանքի համար։ Առողջապահության մամուլի խոսնակ Մարիամ Ծատրյանը «Փաստինֆո»-ին հայտնել է, որ 1 և 3 տարեկան տղաների,ինչպես նաև 28-ամյա կնոջ վիճակը գնահատվում է ծայրահեղ ծանր, իսկ 8-ամյա աղջկա վիճակը՝ ծանր։
Ավելի վաղ հայտնել էինք, որ Շիրակի մարզի Աղին բնակավայրի մոտակայքում ապրիլի 10-ին՝ ժամը 11:50-ի սահմաններում, բախվել են «BMW» և «Opel» մակնիշների ավտոմեքենաներ։ Փրկարար ծառայության տվյալներով՝ վթարի հետևանքով մահացել է վեց մարդ, որոնց թվում 2-ը՝ երեխա։ Եւս 5 մարդ, որոնցից 3-ը՝ երեխա, մարմնական վնասվածքներով հոսպիտալացվել են։
Դեպքի առթիվ ՔԿ-ում նախաձեռնվել է քրեական վարույթ՝ Քրեական օրենսգրքի 342-րդ հոդվածի 3-րդ մասի հատկանիշներով՝ «ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որն անզգուշությամբ առաջացրել է երկու կամ ավելի մարդու մահ»: Նշանակվել են դատաբժշկական փորձաքննություններ:
Նախաքննության ընթացքում մեկ անձի նկատմամբ հարուցվել է հանրային քրեական հետապնդում, ու ձերբակալելու որոշում կայացվել:
