Ապրիլի 24-ից առաջ Թրամփին կոչ է արվում հաստատել եւ հիշատակել Հայոց ցեղասպանությունը
Ապրիլի 24-ին Հայոց ցեղասպանության հիշատակության նախաշեմին ԱՄՆ քաղաքացիներին խնդրում ենք կապվել իրենց կոնգրեսականների հետ եւ հորդորել, որ վերջիններս ստորագրեն Կոնգրեսի հայկական հարցերով հանձնախմբի հեղինակած նամակը, որտեղ նախագահ Թրամփին կոչ է արվում հաստատել եւ հիշատակել Հայոց ցեղասպանությունը:Նամակը ստորագրելու կոչով Ձեր կոնգրեսականին կարող եք դիմել հետեւյալ հղմամբ, հայտնում են Ամերիկայի հայկական համագումարի մամուլի ծառայությունից:
1995թ. հիմնված Կոնգրեսի հայկական հարցերով հանձնախումբն (Հայկական հանձնախումբ) օրենսդիրների ոչ պաշտոնական, երկկուսակցական խումբ է, որ նվիրված է ԱՄՆ-Հայաստան հարաբերությունների պահպանման ու ամրապնդման գործին: Կոնգրեսում Հայաստանի եւ ամերիկահայ համայնքի բարեկամների այս բազմակողմ կոալիցիայի համակցված ջանքերն օգնում են ԱՄՆ Կոնգրեսում, Սպիտակ տանը եւ ամերիկացիների շրջանում բարձրացնել հայկական հարցերի վերաբերյալ իրազեկությունը:
